Urukiko rw’Ibanze rwa Kicukiro rwategetse ko Ntihanabayo Samuel uzwi nka Kazungu, nyiri ruganda rwa Ingufu Gin, ndetse na Prof. Emile Bienvenu wahoze ari Umuyobozi Mukuru w’Ikigo cy’Igihugu gishinzwe Ibiribwa n’Imiti (Rwanda FDA), bakomeza gukurikiranwa bafunzwe iminsi 30 y’agateganyo mu gihe iperereza rikomeje ku byaha bakekwaho bifitanye isano n’urujya n’uruza rw’inzoga zitujuje ubuziranenge.
Aba bombi bari mu itsinda ry’abayobozi, abakozi b’inzego za Leta n’abikorera bakurikiranywe nyuma y’iperereza ryagutse ryatangijwe n’Urwego rw’Igihugu rw’Ubugenzacyaha (RIB), ryibanze ku mitangire y’ibyangombwa no ku mikorere y’inganda zakoreshwaga mu gukora no gukwirakwiza inzoga zitujuje ibisabwa.
Ubushinjacyaha bwari bwasabye ko bafungwa by’agateganyo, buvuga ko bugikeneye igihe gihagije cyo gukusanya ibimenyetso no gukomeza iperereza ku ruhare rwa buri wese muri iki kibazo cyagize ingaruka ku buzima n’umutekano by’abaturage.
Kazungu nyiri Nguvu Gin agiye gufungwa iminsi 30 y’agateganyo
Prof. Emile Bienvenu yatawe muri yombi muri Kanama 2026, akurikiranyweho ibyaha bifitanye isano no gutanga ibyangombwa mu buryo bivugwa ko butubahirije imyanzuro y’inzego za tekiniki zari zibifitiye ububasha. Mu bantu bafashwe kandi harimo abandi bakozi ba Rwanda FDA, aba RSB ndetse n’abayobozi bo mu nzego z’ibanze.
Ku ruhande rwa Kazungu, ubushinjacyaha bumuhuza n’ibikorwa by’ikorwa n’ikwirakwizwa ry’inzoga zitujuje ubuziranenge binyuze mu ruganda rwa Ingufu Gin. Iri perereza ryakurikiye ibikorwa bya Leta byo gukura ku isoko inzoga zizwi nk”ibyuma”, nyuma y’uko zagaragayeho kugira ingaruka zikomeye ku buzima bw’abazinywa ndetse no ku mutekano rusange.
More Read
Mu bihe bishize, inzego z’umutekano zatangaje ko ibikorwa byo kurwanya izi nzoga byagize uruhare mu kugabanya ibyaha birimo gukubita no gukomeretsa, bikunze guhuzwa n’ubusinzi bukabije.
Icyemezo cyo gufunga aba bakekwa iminsi 30 y’agateganyo ntabwo ari igihano cya burundu, ahubwo ni icyemezo cy’urukiko kigamije korohereza iperereza. Mu minsi iri imbere, ubushinjacyaha buzakomeza gukusanya ibimenyetso mbere y’uko hafatwa icyemezo ku mizi y’urubanza.
Iyi dosiye yakuruye amaso ya benshi kubera ko ihuriyemo bamwe mu bayobozi bakuru bari bashinzwe kugenzura ubuziranenge bw’ibicuruzwa ndetse n’abashoramari bakoraga mu rwego rw’inganda zikora ibinyobwa bisindisha, mu gihe igihugu cyari kimaze igihe gihanganye n’ikibazo cy’inzoga zitemewe.
