Nyuma y’iminsi 10 Bobi Wine afunzwe yarekuwe ajya hanze aho yafungiwe mu rugo rwe n’umuryangowe.

Bobi Wine yasohotse mu rugo rwe avugana n’abanyamakuru nk’uko bitangazwa n’ikinyamakuru cyo muri Uganda Daily Monitor. Ku nshuro ya mbere kuva tariki 14 z’ukwezi kwa mbere umunsi wabayeho amatora,

Robert Kyagulanyi w’imyaka 38,uzwi cyane ku izina rya Bobi Wine, niwe wari ukomeye cyane mu bantu 11 bahanganye na prezida Yoweri Museveni w’imyaka 76. Museveni amaze imyaka 35 ayoboye Uganda.

Kuva ku munsi w’amatora urugo rwa Bobi Wine rwahise rukikizwa n’abashinzwe umutekano, nta muntu wari wemeye gusohoka cyangwa kwinjira.

Ikinyamakuru Daily Monitor cyo muri Uganda cyanditse kuri Twitter kivuga ko ku nshuro ya mbere kuva itariki 14 y’ukwezi kwa mbere, Bobi Wine yavuganye n’abanyamakuru.

Ku wa mbere urukiko rwategetse ko abasirikare n’abaporisi bava ku rugo rwa Robert Kyagulanyi icyakora uwo mwanzuro ntiwahise wubahirizwa.

Ayo matora yatsinzwe na prezida Yoweri Museveni ku majwi 58.64%. Bobi Wine yaje ku mwanya wa kabiri n’amajwi 34.83% ariko ntiyemera ibyavuye mu matora

Mu cyumweru gishize, abanyamategeko bahagarariye uyu munyamuziki wabaye umunyapolitiki batanze ikirego baregera urukiko gufungwa kwe

Leta ivuga ko kumufungira iwe ari igikorwa cyari kigamije kumubuza gutegura imyigaragambyo yamagana ibyavuye mu matora, Bobi Wine avuga ko ayo matora yibwe.

Urukiko rukuru rwavuze ko gufungira Kyagulanyi iwe mu rugo “ari igikorwa kinyuranyije n’amategeko”.

Ibihugu, imiryango yigenga n’abantu ku giti cyabo, banenze ko amatora muri Uganda yaranzwe no gupyinagaza no kwica abatavugarumwe n’ubutegetsi, bamagana n’ifungwa rya Bobi Wine iwe mu rugo.

Umuryango w’ubumwe bwa Africa wavuze ko amatora muri Uganda yagenze neza kandi yabaye mu mahoro asesuye.