Ikipe y’Igihugu ya Maroc yatangiye neza Igikombe cya Afurika cya 2025 (CAN), itsinda iya Comoros ibitego 2-0 imbere y’imbaga y’abafana bayo mu mukino ufungura irushanwa.
Ni umukino wabaye mu ijoro ryo ku Cyumweru tariki ya 21 Ukuboza 2025, ubera kuri Complexe Sportif Prince Moulay Abdellah yakira abafana ibihumbi 69.500.
Saa tatu z’ijoro ni bwo umusifuzi ukomoka muri Repubulika Iharanira Demokarasi ya Congo (RDC), Jean-Jacques Ndala, yatangije umukino ku mpande zombi.
Maroc ni yo yatangiye neza umukino isatira cyane bidatinze ku munota wa cyenda, yabonye penaliti ku ikosa Kenan Toibibou yakoreye Brahim Diaz mu rubuga rw’amahina.
Iyi penaliti yatewe na Soufiane Rahimi, umupira ukurwamo neza n’umunyezamu Yannick Panador.
Iyi kipe yakomeje kurusha cyane Comoros ariko ikagorwa no kumenera mu bwugarizi bw’iyi kipe bwahagararaga neza.
Mu minota 35, amakipe yombi yakiniraga cyane mu kibuga hagati nta kipe irema uburyo bukomeye bwo gutsinda.
Ku munota wa 42, Maroc yibwiraga ko ibona penaliti ku ikosa Ahmed Soilih yakoreye kuri Brahim Diaz ariko VAR yemeza ko nta kosa ryabaye.
Igice cya mbere cyarangiye amakipe yombi anganyije ubusa ku busa.
Mu gice cya kabiri, Maroc yakomeje gusatira izamu rya Comoros harimo uburyo bwiza bwahushijwe na Neil El Aynaoui ku mupira yateye ari imbere y’izamu ku bw’amahirwe make uca ku ruhande.
Ku munota wa 55, Maroc yafunguye amazamu ku mupira mwiza wahinduwe na Mazraoui usanga Brahim Diaz wari uhagaze neza awushyira mu rushundura.
Ku munota wa 58, Camoros yahushije uburyo bwo kwishyura igitego ku mupira wazamukanywe na rutahizamu Rafik Said awuteye ishoti rikurwamo n’umunyezamu Yasin Bono.
Ku munota wa 63, Maroc yabonye uburyo bwo gutsinda igitego cya kabiri ku ishoti rikomeye ryatewe na Mazraoui ari hanze y’uburuga rw’amahina, umupira ukurwamo n’umunyezamu Yannick Pandor.
Ku munota wa 64, Umutoza wa Maroc Walid Regragui, yakoze impinduka ebyiri Abdesamad na Ayoub El Kaabi basimbura Azzedeni Ounahi na Soufiane Rahimi.
Izi mpinduka zatanze umusaruro kuko ku munota wa 74, rutahizamu Ayoub El Kaabi yatsinze igitego cya kabiri ku mupira yateye agaramye, umunyezamu ananirwa gukuraho umupira uruhukira mu izamu.
Umukino warangiye Maroc itsinze Comoros ibitego 2-0, itangira neza igikombe cya Afurika cya 2025.
Umukino ukurikiraho muri iri tsinda urakinwa kuri uyu wa Mbere tariki ya 22 Ukuboza, hagati ya Mali na Zambia.
Si iri tsinda rikina gusa kuko na Afurika y’Epfo ikina na Angola naho Misiri ikine na Zimbabwe mu Itsinda B
Comments are closed.