USA: Ushinzwe imiti nta vuga rumwe na Perezida Trump kugihe urukingo rwa Covid-19 ruzabonekera

Umwe mu bakuriye ibyo kugenzurano kwemeza imiti muri Amerika aranenga ibyo Perezida Donald Trump we avuga ko urukingo rwa Covid-19 ruzaboneka muri uyu mwaka.

Isi ikomeje gutegereje urukingo nk’igisubizo ntakuka kuri Covid-19 imaze kwica abantu barenga 500,000 no kwandura abarenga miliyoni 11 ku isi.

Dr Stephen Hahn, komiseri mu kigo cya leta ya Amerika cya ‘Food and Drug Administration’ (FDA) ejo ku cyumweru yagize ati: “Sinavuga ngo urukingo ruzaboneka ryari.”

Urukingo rwatoza ubwirinzi bw’umubiri w’umuntu kurwanya iyi virus bityo ntabashe kuyirwara.

Dr Hahn uri mu itsinda ry’ibiro bya Perezida ryo kurwanya iki cyorezo, yari abajijwe icyo avuga ku gihe Perezida Trump avuga ko urukingo ruzaboneka “kare cyane muri uyu mwaka”.

Mu ijambo ry’umunsi w’ubwigenge bwa Amerika, Bwana Trump yavugiye ku biro bye bya White House ati:

“Ndashaka gushimira abahanga muri siyansi n’abashakashatsi mu gihugu, yewe no ku isi, bari gukora ibishoboka ngo haboneke imiti ivura ndetse n’urukingo”.

“Turi gukoresha abahanga b’igihugu kandi birashoboka cyane ko twabona umuti cyangwa urukingo mbere cyane ko uyu mwaka urangira.”

Amerika ni cyo gihugu kizahajwe na covid-19 kurusha ibindi ku isi kuko imaze kwica abantu hafi 130,000 n’abandura bakaba bakomeje kwiyongera aho ubu barenga miliyoni 2.800 000

Abahanga muri siyansi bavuga ko urukingo rwa Covid-19 rudashobora kuboneka mbere nibura yo hagati mu mwaka wa 2021. nubwo inkingo zatangiye kugeragerezwa ku bantu.

Mu kiganiro na televiziyo ABC News ku cyumweru, Dr Hahn yavuze ko urukingo ruri gushakishwa ku muvuduko udasanzwe, ariko ntiyavuze igihe rushobora kubonekera.

Yagize ati: “Ikintu gusa twakwizeza Abanyamerika ni uko ku by’urukingo tuzafata umwanzuro ushingiye kuri siyansi.”

uwakwibaza ngo Ese gushaka urukingo bigeze he?

Kugera ku rukingo ubundi bifata imyaka, iyo bitanabaye imyaka irenga 10, ariko abahanga muri siyansi bari kwihuta bishoboka mu kugabanya igihe bisanzwe bifata ngo haboneke urwa Covid-19.

Ku isi ubu hari gahunda zigera ku 120 z’inkingo ziri gukorwa.

Kaminuza za Oxford na Imperial London College zo mu Bwongereza zombi zatangiye amagerageza ku bantu y’inkingo bakoze.

Abahanga mu buzima bo muri Amerika bagaragaza icyizere kigereranyije ko urukingo ruzaba rwatangiye gukorwa ari rwinshi ngo ruhabwe abantu muri uyu mwaka cyangwa mu ntangiriro z’utaha.

Dr Anthony Fauci inzobere mu by’indwara zandura muri Amerika aherutse kuvuga ko kumenya ko hari urukingo rukora neza bishobora kuzaba byagezweho mu gihembwe cya nyuma cy’uyu mwaka.

Dr Fauci yavuze ko amagerageza y’inkingo ashobora kuzaba ari mu byiciro bya nyuma muri uku kwezi kwa karindwi.

Isi yose ikaba ikomeje kwibaza no gukora ubushakashatsi kuhazava umuti n’urukingo rwa Covid-19