Ikipe ya Gisagara VC nyuma yo kwitwara neza mu mukino wa kabiri mu itsinda D yahise ikatisha itike ya ¼ cy’irangiza mu mikino y’Afurika y’amakipe yabaye aya mbere iwayo mu bagabo “Men’s African Volleyball Clubs Championship 2022” irimo kubera muri Tunisia.
Iyi kipe ya Gisagara VC ku mukino wa kabiri mu itsinda D wabaye kuri uyu wa Mbere taliki 09 Gicurasi 2022 yitwaye neza itsinda Equity Bank yo muri Kenya amaseti 3-2 (25-18,22-25, 25-15 na 25-18). Nyuma yo gutsinda umukino wa kabiri, Gisagara VC yahise ibona itike ya ¼ cy’irangiza ikaba isigaje umukino wa nyuma mu itsinda isabwa gutsinda kugira ngo izamuke iyoboye itsinda .
Muri iri tsinda, undi mukino wabaye ikipe ya Port de Douala yo muri Cameroun yari yatsinzwe na Gisagara VC mu mukino ubanza amaseti 3-1 yitwaye neza itsinda Nigeria Customs amaseti 3-2 (22-25,18-25, 25-13, 25-23 na 15-12). Iyi kipe ya Nigeria Customs ikaba yari yatsinze Equity Bank ku mukino wa mbere amaseti 3-0.
Imikino y’umunsi wa nyuma mu itsinda iteganyijwe taliki 11 Gicurasi 2022 aho ikipe ya Nigeria Customs izakina na Gisagara VC aho Port de Douala ikine na Equity Bank. Ikipe ya Nigeria Customs na Port de Douala hagomba kuzavamo imwe izamukana na Gisagara VC muri ¼ mu gihe ikipe ya Equity Bank yo yamaze gusezererwa.
Ikipe ya Gisagara VC nubwo yabonye itike ya ¼ irasabwa gutsinda Nigeria Customs kugira ngo isoze iyoboye itsinda D bityo bizatume ihura n’ikipe ya kabiri mu itsinda B hagati ya Wolaita Dicha (Ethiopia) na AS Douanes (Burkina Faso). Ibi bikaba byatuma iyi kipe yizera gukomeza muri ½ ikaba yakora amateka yaherukaga muri 2011 ubwo ikipe ya UNR VC yari yaserukiye u Rwanda yageraga muri ½ igasoreza ku mwanya wa 4.
Equity Bank 1-3 Gisagara VC
Port de Douala 3-2 Nigeria Customs
Taliki 11-05-2022
Nigeria Customs-Gisagara VC (16h00)
Port de Douala- Equity Bank (18h00)
Comments are closed.