Bwana Cristiano Ronaldo wari usanzwe ukinira Al-Nassr yo muri Arabiya Saoudite, yaciye amarenga ko ashobora kuva muri iyo kipe akerekeza ahandi.
Cristiano Ronaldo yatangaje amakuru benshi bafashe nko gusezera ikipe ya Al-Nassr nubwo aho agiye kwerekeza kugeza ubu hatazwi, gusa yagaragaje ko gukina umupira byo abikomeza.
Hari hashize hafi isaha imwe mu ijoro ryakeye atsindiye Al-Nassr igitego mu mukino wa nyuma wa shampiyona ya Saudi Pro League aho ikipe ye yatsinzwe na Al-Fateh 3 kuri 2.
Uyu mukinnyi w’imyaka 40 yanditse ubutumwa kuri X na Instagram aho yagize ati: “Iki gika kirarangiye”, asa n’uvuga ko gukinira iyi kipe abishyizeho akadomo.
Yongeraho ati: “Inkuru? Yo iracyandikwa. Ndashimira byose.”
Nubwo atavuze aho agiye kwerekeza, hari amakuru avuga ko ashakwa n’amakipe yo muri Major League Soccer muri Amerika, cyangwa ko ashobora kwerekeza mu ikipe yahereyemo ya Sporting CP iwabo muri Portugal.
Uyu munya Portugal yanditse amateka akomeye muri ruhago, ndetse benshi bemeza ko mu myaka mike ishize yayoboye ibendera ry’uno mukino ukunzwe na benshi, ariko bigakomeza gutera impaka kuwaba ariwe wa mbere hagati ye na Lionel Messi.
Comments are closed.