Umuhanzi Yampano yasabiwe n’Ubushinjacyaha igifungo cy’imyaka irindwi n’amezi 11, ahanishwa n’ihazabu y’amafaranga y’u Rwanda ibihumbi 800, mu rubanza rw’ibyaha bitanu akurikiranyweho birimo gukoresha ibikangisho, kwangiza ikintu cy’undi, kunywa urumogi, gukubita no gukomeretsa ku bushake ndetse n’ivangura.
Ibi byabereye mu Rukiko Rwisumbuye rwa Nyarugenge ku wa Gatatu, tariki ya 4 Ugushyingo 2026, ubwo Yampano yaburanaga mu mizi, agasobanura uruhande rwe ku byaha aregwa n’ibimenyetso Ubushinjacyaha bumuregesha
Muri ibi byaha bitanu, Yampano yemeye ibyo gukubita no gukomeretsa ku bushake, kwangiza ikintu cy’undi no kunywa urumogi, ariko ahakana yivuye inyuma ibyaha byo gukoresha ibikangisho n’ivangura.
Ubushinjacyaha bwasobanuye ibirego bishinja Yampano
Ubushinjacyaha bwabwiye urukiko ko mu bihe bitandukanye Yampano yagiye atoteza umugore we, Uwineza Diane, amukubita ndetse ko hari n’igihe yamugongesheje imodoka ku bushake.
More Read
Ku cyaha cyo gukoresha ibikangisho, Ubushinjacyaha bwavuze ko mu bihe bitandukanye Yampano yakubitaga umugore we, akamubwira ko azamwica, ndetse akamubwira ko azajya kwirega ku Rwego rw’Igihugu rw’Ubugenzacyaha (RIB).
Ku bijyanye n’icyaha cy’ivangura, Ubushinjacyaha bwavuze ko Yampano yakubise Uwineza urushyi mu maso, amuruma mu kwaha, amukomeretsa mu ijosi ndetse akamuruma izuru.
Umushinjacyaha yavuze ko ubwo Yampano yarumaga umugore we izuru, yamubwiye amagambo agaragaza ivangura rishingiye ku bwoko, agira ati: “Abatutsi nta bwenge bagira, biratana amazuru”, ndetse ko hari n’andi magambo yavuze agaragaza ko umuntu yayaca.
Ibi byatumye umucamanza abaza Umushinjacyaha icyo ashingiraho ashinja Yampano icyaha cy’ivangura. Umushinjacyaha yasubije ko ibyo birego bishingiye ku magambo Uwineza yavuze ko yabwiwe n’uyu muhanzi.
Yampano yahakanye ivangura, avuga ko atari kubana n’umugore we arifite
Yampano ahawe umwanya wo kwisobanura, yavuze ko atibuka neza niba yarigeze kuvuga ayo magambo, ariko avuga ko n’umugore we hari amagambo yamubwiye, amubwira ko iwabo batagisura urugo rwabo kubera ko yashatse mu Bahutu.
Uyu muhanzi yahakanye ko afite imyumvire y’ivangura, avuga ko iyo aza kuba ayifite atari kwemera kubana na Uwineza imyaka ibiri bari bamaranye.
Yagize ati: “Nta vangura ngira rwose.”
Mu gushimangira ibyo, Yampano yibukije urukiko ko mu mwaka wa 2023 na 2024 yakoze indirimbo igamije kurwanya ivangura, avuga ko ibyo na byo bigaragaza ko adashyigikira imyumvire ishingiye ku vangura.
Yongeyeho ko Uwineza yigeze kwandika ko icyatumye ajya kumurega ari uburakari yari afite, avuga ko icyaha cy’ivangura yakimushinje abitewe n’amarangamutima, kandi ko nta bimenyetso bihagije byagishyigikira.
Yampano kandi yahakanye ko yakangishije umugore we kumwica, avuga ko kuba yaragiye kwitaba RIB Uwineza akiriho ari ikimenyetso cy’uko atigeze agira umugambi wo kumwica.
Yampano yavuze ko amakimbirane yaturutse ku bicuruzwa byo mu rugo
Mu kwisobanura ku byabaye hagati ye na Uwineza, Yampano yavuze ko ubwo yajyaga i Burayi, nyuma y’uko ku mbuga nkoranyambaga hakwirakwiye amashusho yabo bwite, umugore we yatekereje ko amutorotse, maze agurisha ibintu byose byari mu rugo.
Yavuze ko agarutse mu Rwanda yasabye Uwineza kugarura ibyo yari yagurishije, ari na ho havuye amakimbirane yakomeje kubaranga, agera no ku kurwana inshuro zitandukanye.
Ku bijyanye na telefone yangije, Yampano yavuze ko yamaze kwishyura umugore we amafaranga yari ayifite.
Yongeyeho ko mu rubanza rw’ifungwa n’ifungurwa ry’agateganyo yari akurikiranyweho ibyaha bine, bityo akaba yaratunguwe no kubona icyaha cy’ivangura cyongerwamo ku wa 21 Kanama 2026.
Umunyamategeko wa Yampano yasabye ko yoroherezwa ibihano
Me Rudahusha Didier, umunyamategeko wunganira Yampano, yabwiye urukiko ko umukiliya we yemera ibyaha bitatu ndetse ko yanagerageje kwiyunga n’uwo byakorewe.
Ku cyaha cyo kunywa urumogi, yavuze ko Yampano ari we wafashe iya mbere akajya kwivuza ku bushake bwe, asaba urukiko kuzabishingiraho mu kumugabanyiriza igihano cyangwa rukamusubikira igihano.
Ku cyaha cyo gukoresha ibikangisho, Me Rudahusha yavuze ko muri dosiye y’urubanza harimo ibaruwa ya Uwineza igaragaza ko hari ibyo yavuze mu burakari, bityo asaba ko urukiko ruzabisuzuma mbere yo gufata icyemezo kuri icyo cyaha.
Yagaragaje kandi amashusho ya Uwineza agaragaza ko yababariye umugabo we, avuga ko ibyo na byo bikwiye kwitabwaho mu gihe cyo kugena igihano.
Umunyamategeko yibukije urukiko ko ibyaha bitatu umukiliya we yemera bihanishwa ibihano bitarenze imyaka itanu, avuga ko kuba nyirubwite yaramubabariye, Yampano akemera ibyo yakoze, bikwiye gufasha mu kumugabanyiriza igihano.
Yasabye urukiko ko mu gihe ruzaba rufata umwanzuro, rwazashingira ku mbabazi za Uwineza, ku kwemera ibyaha kwa Yampano no ku kuba yaremeye kwicuza.
Ubushinjacyaha bwavuze ko imbabazi z’umugore zigomba gusuzumwa
Mu gusubiza ibitekerezo by’ubwunganizi, Ubushinjacyaha bwavuze ko icyaha cy’ivangura bwongeye mu byo Yampano aregwa bwabikoze bukurikije amategeko.
Ku bijyanye n’ubuhuza bwari bwifujwe n’uruhande rwa Yampano, Umushinjacyaha yavuze ko Ubushinjacyaha bufite uburenganzira bwo kubusuzuma bukareba niba hari impamvu zatuma bwemerwa.
Ku mbabazi Uwineza yagaragaje ko yahaye umugabo we, Umushinjacyaha yavuze ko nta cyemeza ko yazitanze nta gitutu yashyizweho. Icyakora, yavuze ko icyo kibazo agiharira urukiko kugira ngo ruzagisuzume mu bushishozi bwarwo.
Yampano yasabiwe imyaka 7 n’amezi 11 n’ihazabu ya 800.000 Frw
Mu gusaba ibihano, Ubushinjacyaha bwasabye urukiko guhana Yampano muri ubu buryo:
- Ku cyaha cyo gukoresha ibikangisho: gufungwa amezi atandatu.
- Ku cyaha cyo kwangiza ikintu cy’undi: gufungwa amezi atanu.
- Ku cyaha cyo kunywa urumogi: gufungwa umwaka umwe.
- Ku cyaha cyo gukubita no gukomeretsa ku bushake: gufungwa umwaka umwe no gucibwa ihazabu y’ibihumbi 300 Frw.
- Ku cyaha cy’ivangura: gufungwa imyaka itanu no gucibwa ihazabu y’ibihumbi 500 Frw.
Igiteranyo cy’ibihano Ubushinjacyaha bwasabiye uyu muhanzi ni igifungo cy’imyaka irindwi n’amezi 11 n’ihazabu y’amafaranga y’u Rwanda ibihumbi 800.
Yampano amaze kumva ibihano yasabiwe, yabajije Umushinjacyaha impamvu yibanze cyane ku gushaka ibimenyetso bimushinja kurusha ibimushinjura, kandi ko ibyo byose biri mu nshingano z’Ubushinjacyaha.
Umushinjacyaha yamusubije ko ikimenyetso gikomeye kimushinjura ari imbabazi z’umugore we, ariko ko atazishingiyeho cyane kuko atizeye neza ko zatanzwe nta gitutu Uwineza yashyizweho. Ni yo mpamvu yasabye urukiko kuzigenzura rukamenya niba koko zatanzwe ku bushake.
Yampano yasabye kugirwa umwere ku cyaha cy’ivangura
Mu ijambo rye rya nyuma, Yampano yasabye urukiko kumugira umwere ku cyaha cy’ivangura, asomerera urukiko ibaruwa yari yanditse asaba imbabazi, anashimangira ko atigeze agira imyumvire ishingiye ku vangura.
Yongeye guhakana ko yarumye umugore we izuru, avuga ko raporo ya muganga iri muri dosiye itagaragaza igikomere kuri icyo gice cy’umubiri. Yasabye urukiko kuzashingira kuri iyo raporo mu gufata umwanzuro.
Ku byaha yemera, yasabye guhabwa ibihano byoroheje bishoboka cyangwa agasubikirwa igihano. Yavuze ko ari ubwa mbere akurikiranywe n’ubutabera, kandi ko igihe amaze mu Igororero rya Nyarugenge cyamwigishije byinshi.
Yampano yavuze ko akwiye kugirirwa imbabazi hashingiwe ku kuba yemeye ibyaha bimwe, akicuza, ndetse n’uko umugore we yamubabariye.
Yongeyeho ko nk’umuhanzi, aramutse agiriwe imbabazi, ashobora gukoresha impano ye mu gutanga ubutumwa bwo kurwanya ibiyobyabwenge no gukangurira urubyiruko kubyirinda.
Yampano yatawe muri yombi ku wa 16 Gicurasi 2026, afungwa kuva muri Kamena uwo mwaka mu Igororero rya Nyarugenge.
Urukiko Rwisumbuye rwa Nyarugenge rwanzuye ko umwanzuro w’uru rubanza uzasomwa ku wa 16 Ukuboza 2026, ari bwo hazamenyekana icyemezo ruzafata ku byaha uyu muhanzi akurikiranyweho.
