Papa Leo XIV yatangiye uruzinduko rw’akazi muri Amerika y’Epfo, nyuma y’ibyumweru bitatu abaganga bamubaze bakamukuraho ikibyimba cyo mu bihaha, mu ruzinduko rufite igisobanuro cyihariye kuri we, cyane cyane kubera ko azasubira muri Peru, igihugu yamazemo imyaka myinshi akora ubutumwa bwa Kiliziya Gatolika.
Uru ruzinduko rurimo ibihugu bya Uruguay, Argentine na Peru, aho Papa ategerejwe n’abakirisitu benshi, by’umwihariko muri Peru, igihugu afitanye na cyo amateka akomeye kuko ari ho yamaze igihe kinini ari padiri mbere yo gutorerwa kuyobora Kiliziya Gatolika ku isi.
Mu gihe hari impungenge z’abakirisitu n’abakurikiranira hafi ubuzima bw’uyu mushumba wa Kiliziya Gatolika, ubuyobozi bwa Vatican bwatangaje ko nta ngamba zidasanzwe zijyanye n’ubuzima bwe zateganyijwe muri uru rugendo. Bwasobanuye ko Papa Leo XIV ari umuntu w’imyaka 71 umaze igihe gito abazwe, ariko ko atafatwa nk’umuntu ufite indwara ihoraho imubuza gukora inshingano ze.
Mu kwezi gushize, Papa Leo XIV ubwe ni we watangaje ko abaganga bavumbuye ikibyimba mu bihaha bye ubwo yari arimo gukorerwa isuzuma risanzwe ry’ubuzima. Nyuma y’ibindi bizamini, abaganga bahisemo kumubaga, bakuraho icyo kibyimba ndetse n’igice cyo hasi cy’igihaha cye cy’iburyo.
Itsinda ry’abaganga bamukurikirana ryaje gutangaza ko kanseri yari afite itagaragaje ibimenyetso byo gukwirakwira mu bindi bice by’umubiri, amakuru yatanze icyizere ku buzima bwe n’ubushobozi bwo gukomeza inshingano ze.
More Read
Mu kiganiro cyabereye i Roma mbere y’uko atangira uru rugendo, umuvugizi wa Papa yashimangiye ko afite imbaraga zidasanzwe ndetse n’ishyaka rikomeye ryo gukora ibikorwa biteganyijwe muri gahunda y’uruzinduko.
Yavuze ko gahunda y’uru rugendo yateguwe kandi yemezwa na Papa ubwe, nta mpinduka zigeze ziyikorerwamo, nubwo aherutse kubagwa.
Uru ruzinduko rufatwa nk’urufite akamaro gakomeye kuri Papa Leo XIV, haba mu rwego rw’ubutumwa bwa Kiliziya Gatolika ndetse no ku giti cye, cyane cyane igice cyo gusubira muri Peru, igihugu afitanye na cyo amateka yihariye y’ubuzima n’umurimo w’iyobokamana.
