Mu Karere ka Rulindo, mu murenge wa Kinzuzi, haravugwa amakuru y’umuturage wigize agihare akajya afata abantu akabazirikisha amapingu bivugwa ko yatorokanye ubwo yari afunze.
Umwe mu baturage baganiriye na Radio/TV1 yavuze ko uwo mugabo wigize umunyarugomo ku ngufu yiyise Gafuna, akaba yarigeze gufungwa, ariko akaza gutorokana amapingu n’imfunguzo z’ayo.
Mazimpaka nawe uvuga ko aturanye n’uyu mugabo yabwiye umunyamakuru wacu ati:”Uriya mugabo agira urugomo, ubundi asanzwe akorera mu gasantere ka Rugaragara, amakuru mfite ni uko ajya afata abantu akabafungisha amapingu yatorokanye, ni ibintu bizwi hano”
Twagerageje kuvugisha Gitifu w’umurenge wa Kinzuzi, ariko kugeza ubu ntari kubasha kutwitaba, yewe twagerageje gushakisha n’uwo mugabo uvugwaho urwo rugomo ariko nawe ntitwagize amahirwe yo kumubona ku murongo wa terefone.
Gusa, hari ababashije kuvugana CIP Ngirabakunzi Ignace uvugira Polisi mu Ntara y’Amajyaruguru, avuga ko ayo makuru atari ayazi, ko ahubwo bagiye gukurikiranira hafi ukuri kwabyo.
