Inzego z’iperereza n’umutekano mu Bubiligi zasatse urugo rwa Perezida Félix Tshisekedi wa Repubulika Iharanira Demokarasi ya Congo ruri i Bruxelles ndetse n’iz’abandi benshi barimo abo mu muryango we, bose bakekwaho ibyaha bifitanye isano no kunyereza umutungo.
Iri sakwa ryabaye kuri uyu wa 14 Ukwakira 2026, nk’uko byemejwe n’Ubushinjacyaha Bukuru bw’u Bubiligi, bwavuze ko butatangaza byinshi kugira ngo bitabangamira iperereza rikomeje.
Amakuru yatangajwe n’ibitangazamakuru byo mu Bubiligi, birimo La Libre, avuga ko abapolisi benshi, bitabiriye ibi bikorwa byabereye icyarimwe mu bice bitandukanye bya Bruxelles no mu ntara za Brabant-Flamand na Brabant-Wallon, hose haba cyangwa hari inzu n’imitungo ya Perezida Tshisekedi n’abo mu muryango we.
Iri sakwa rigamije gukusanya amakuru ku mutungo n’imari byabo mu muryango wa Tshisekedi barezwe ibyaha bifitanye isano no kunyereza umutungo.
Amakuru avuga mu mezi ashize inzego z’ubutabera mu Bubiligi zari zasabye amakuru kuri konti za banki z’abakekwa kugira ngo zisuzume ihererekanywa ry’amafaranga.
Muri Nyakanga 2025 nibwo Ubushinjacyaha bw’u Bubiligi bwashyikirijwe dosiye y’abantu icyenda bo mu muryango wa Perezida Tshisekedi baregwa kwiba amabuye y’agaciro mu ntara ya Haut-Katanga na Lualaba.
Ni ikirego icyo gihe cyatanzwe n’Abanyamategeko Bernard Maingain na Brieuc Maingain. Aba banyamategeko bahagarariye imiryango itandukanye itegamiye kuri Leta ikorera mu ntara ya Haut-Katanga na Lualaba ndetse na bane bahoze mu buyobozi bwa sosiyete ya Gécamines ishinzwe ubucukuzi n’ubucuruzi bw’amabuye y’agaciro muri Katanga.
Abatanze ikirego bavuga ko ibikorwa by’ubusahuzi bw’amabuye y’agaciro muri Katanga byatangiye mu 2015, bikaza gufata intera ikomeye mu 2019, ubwo Félix Tshisekedi yajyaga ku butegetsi.
Mu bantu barezwe harimo Christian Tshisekedi, umuvandimwe wa Perezida, umugore we Denise Nyakeru Tshisekedi, umuhungu we Anthony Tshisekedi, babyara be na muramukazi we.
Abareze bavuga ko bamwe mu bo mu muryango wa Perezida Tshisekedi bambuye abantu ibirombe by’amabuye y’agaciro muri Katanga, bagashyiramo abasirikare babirindira umutekano.
