Perezida w’Umutwe w’Abadepite, Kazarwa Gertrude, yagiranye ibiganiro n’Umugenzuzi Mukuru w’Imari ya Leta, Claudette Mukashyaka, bigamije gushimangira ubufatanye hagati y’inzego zombi mu guteza imbere imicungire inoze y’umutungo wa Leta, kubazwa inshingano no kongera ubushobozi bw’Inteko Ishinga Amategeko mu kugenzura ibikorwa bya Guverinoma.
Ibi biganiro byabaye kuri uyu wa Kabiri, byibanze ku gushaka uburyo ubufatanye hagati y’Inteko Ishinga Amategeko n’Urwego rw’Ubugenzuzi Bukuru bw’Imari ya Leta (Office of the Auditor General) bwakomeza kongerwa, kugira ngo bugire uruhare mu kunoza imikoreshereze y’umutungo wa Leta no gukumira imicungire mibi yawo.
Ubugenzuzi bw’imikoreshereze y’umutungo wa Leta ni imwe mu nkingi z’ingenzi mu miyoborere myiza, kuko bufasha kumenya niba amafaranga n’ibindi bikoresho bya Leta bikoreshwa mu buryo bukurikije amategeko, bigatanga umusaruro wari uteganyijwe kandi bigafasha inzego bireba kubazwa inshingano.
Mu biganiro byabo, hanagarutswe ku kamaro ko kongera ubushobozi bw’Inteko Ishinga Amategeko mu gusesengura raporo z’ubugenzuzi, gukurikirana ishyirwa mu bikorwa ry’imyanzuro itangwa n’Umugenzuzi Mukuru w’Imari ya Leta no gusaba ibisobanuro inzego za Guverinoma ku bibazo bigaragara mu micungire y’umutungo rusange.
Ubufatanye nk’ubu bushobora gufasha kurushaho kunoza uburyo raporo z’ubugenzuzi zikoreshwa mu gufata ibyemezo, gukosora ibitagenda neza no gukumira ko amakosa agaragara mu micungire y’imari ya Leta ahora asubira.
Inteko Ishinga Amategeko, binyuze mu nshingano zayo zo kugenzura ibikorwa bya Guverinoma, ifite uruhare rukomeye mu gukurikirana uko umutungo w’igihugu ucungwa, mu gihe Urwego rw’Ubugenzuzi Bukuru bw’Imari ya Leta rufite inshingano zo kugenzura imikoreshereze yawo no gutanga raporo ku byagaragaye.
Gukomeza gukorana kw’izi nzego rero ni ingenzi mu guteza imbere gukorera mu mucyo, gukoresha neza umutungo w’igihugu no gushimangira umuco wo kubazwa inshingano mu nzego za Leta.