Wednesday, June 29, 2022
HomeImikinoGisagara Volley Ball Club yerekeje muri Tunisiya mu mikino Nyafrika

Gisagara Volley Ball Club yerekeje muri Tunisiya mu mikino Nyafrika

Mu rukerera rwo kuri uyu wa Kane taliki 05 Gicurasi 2022 ni bwo ikipe ya Gisagara VC yahagurutse mu Rwanda yerekeje i Tunis muri Tunisia aho  igiye kwitabira imikino y’Afurika y’amakipe yabaye aya mbere wayo mu bagabo  “Men’s African Volleyball Clubs Championship 2022” izaba taliki 05 kugeza 18 Gicurasi 2022.

Ikipe ya Gisagara VC yabonye itike yo guserukira u Rwanda nyuma yo kwegukana irushanwa ryateguwe na Kompanyi ya “Forzza Bet” ikora ibijyanye no gutega ku mikino itandukanye “Forzza Volleyball Tournament 2021-2022”.

Ikipe ya Gisagara VC yajyanye abakinnyi 13 akaba ari bo izifashisha muri iri rushanwa igiye kwitabira ku nshuro ya kabiri.

Aba bakinnyi ni Akumuntu Kavalo Patrick, Ndyisaba Sylvestre, Adamou Doudou Djibril, Ndahayo Dieu est La, Niyogisubizo Samuel, Kanamugire Prince, Mugabo Thierry, Muvara Ronald, Bigirimana Peter, Nkurunziza John, Niyonshima Samuel, Malinga Kathbart na Ikirezi Blaise. Umutoza Mukuru ni Nyirimana Fidele akaba yungirijwe na Ndamukunda Flavier.

Biteganyijwe ko amakipe 19 ari yo  ashobora kwitabira imikino y’Afurika “Men’s African Volleyball Clubs Championship 2022” ari  yo Gisagara VC (Rwanda), Amical (Burundi), AS Douanes (Burkina Faso), AS INJS (Cote d’Ivoire), Port Douala (Cameroun), VC Green, VS Espoir (RDC), Ahly SC (Misiri), Wolaitta Dicha, Maada Walube (Ethiopia), Olympafrica Serekunda (Gambia), Equity Bank, KPA (Kenya), Al Ahli Tripolis (Libiya), Nigeria Customs (Nigeria), Club Olympique de Kelibia, Esperance, Mouloudia  na Avenir Marsa (Tunisia).

Ikipe ya Gisagara VC iyi ni inshuro ya 2 igiye kwitabira imikino y’Afurika kuko muri 2019 yitabiriye ku nshuro ya mbere ubwo iyi mikino yaberaga mu Misiri maze isoreza ku mwanya wa 10 mu makipe 22 yari yitabiriye mu gihe ikipe ya Al Ahly  yo mu Misiri ari yo yegukanye igikombe itsinze ikipe ya Smouha SC nayo yo mu Misiri amaseti 3-0.

Muri 2020  iyi mikino nta bwo yabaye, ubwo  iheruka kuba muri 2021 muri Tunizia, ikipe ya REG VC na APR VC ni zo zahagarariye u Rwanda maze REG VC isoreza ku mwanya wa 9 naho APR VC isoreza ku mwanya wa 10. Ikipe ya  ES de Tunis VC (Tunisia) ni yo yegukanye igikombe itsinze Zamalek VC (Misiri) amaseti 3-0.

Ikipe yo mu Rwanda mu mateka yitwaye neza muri iyi mikino y’Afurika  ni UNR VC muri 2011 ubwo yegukanaga umwanya wa 4 nyuma yo kuviramo muri ½ cy’irangiza ikanatsindwa umukino wo guhatanira umwanya wa 3.

RELATED ARTICLES
- Advertisment -

Most Popular

Recent Comments