Amerika yatangaje igihembo cya miliyoni 5 z’amadolari (arenga miliyari 5Frw) ku muntu wese watanga amakuru yatuma hafatwa Seka Musa Baluku, umukuru w’umutwe w’inyeshyamba wa ADF wo muri Repubulika ya Demokarasi ya Congo, ufitanye imikoranire n’umutwe wiyita Leta ya Kisilamu (IS).
Minisiteri y’ububanyi n’amahanga y’Amerika yavuze ko uyu mukuru wa ADF urimo gushakishwa ari Umunya-Uganda ushobora kuba ari mu kigero cy’imyaka 40 isatira 50.
Mu itangazo, gahunda yo gutanga ibihembo kugira ngo hagerwe ku butabera (Rewards for Justice) yo muri minisiteri y’ububanyi n’amahanga y’Amerika yagize iti:
“Ku butegetsi bwa Seka Musa Baluku, uyu mutwe uribasira, urica, uramugaza, ufata abagore ku ngufu ndetse ukora urundi rugomo rushingiye ku gitsina kandi ugakora ibikorwa byo gushimuta abasivile, barimo n’abana.
Iryo tangazo rivuga ko uyu “mutwe unakura abarwanyi [mu bana] ndetse ugakoresha abana mu bitero no kubakoresha imirimo y’agahato” muri teritwari (territoire) ya Beni muri Kivu ya Ruguru mu burasirazuba bwa DR Congo.
ADF ishinjwa kwica abaturage b’abasivile b’Abanye-Congo babarirwa mu bihumbi no kugaba ibitero by’ibisasu muri Uganda.
Mu mwaka wa 2020 wonyine, uyu mutwe wishe abasivile barenga 849, nkuko bivugwa n’akanama k’umutekano k’umuryango w’abibumbye (ONU/UN).
Umutwe wa ADF watangiye ugaba ibitero bwa mbere muri Uganda mu myaka ya 1990.
Mu 2021, Amerika yawushyize ku rutonde rw’imitwe y’iterabwoba. Ni umwe mu mitwe yitwaje intwaro irenga 100 ikorera mu burasirazuba bwa DR Congo.
