F.C Barcelona yahabwaga amahirwe yo kwitwara neza muri Europa League yasezerewe mu ijoro ryo kuri uyu wa Kane, itsinzwe na Eintracht Frankfurt yo mu Budage ibitego 3-2.
Iyi kipe ikomeye yo muri Espagne yasezerewe ku giteranyo cy’ibitego 4-3, kuko mu mukino ubanza wabereye mu Budage banganyije igitego 1-1.
Ni umukino warebwe cyane kuko abafana nibura 30,000 ba Frankfurt bari bagiye muri Espagne.
Nyamara Barcelona yihariye umupira ku kigero cya 75% kuri 25% ya Frankfurt. Gusa Frankfurt yabarushije amashoti 15 yateye iganisha mu izamu ku 10 ya Barcelona, arimo 7 baboneje neza nubwo atavuyemo ibitego, ugereranyije na 4 ya Barcelona.
Frankfrurt igeze muri kimwe cya kabiri ku nshuro ya kabiri mu myaka ine ishize, nyuma yo gusezererwa na Chelsea nanone kuri iki cyiciro mu 2019.
Uyu mukino waciye intege abafana na FC Barcelona yari imaze kuzahuka kuva yatangira gutozwa na Xavi Hernandez, nyamara mu mikino yo mu Burayi yakiriye ku kibuga cyayo yatsinze umukino umwe gusa.
Muri shampiyona yo muri Espagne naho irushanwa na Real Madrid ya mmere amanota 12.
Mu mikino yabaye, West Ham United yo mu Bwongereza, RB Leipzig yo mu Budage na Rangers yo muri Ecosse zageze muri kimwe cya kabiri cy’iri rushanwa.
West ham yatsinze Lyon yo mu Bufaransa ibitego 3-0, mu gihe umukino ubanza banganyije 1-1.
Leipzig yo yatsinze Atalanta 2-0 mu mukino wabereye mu Butaliyani, bituma mu mikino yombi iza imbere n’ibitego 3-1. Mu mukino ubanza wabereye mu Budage banganyije 1-1.
Indi kipe yageze muri kimwe cya kabiri ni Rangers, yatsinze Braga yo muri Portugal ibitego 2-1 mu mukino wabereye i Glasgow, mu gihe mu mukino ubanza yari yatsinzwe 1-0.
Umukino wa nyuma uzabera kuri stade Ramón Sánchez-Pizjuán y’ikipe ya Seville muri Espagne, ku wa Gatatu tariki 18 Gicurasi.
Ikipe izatwara iki gikombe kizayihesha itike yo gukina UEFA Champions League ihereye mu matsinda, mu mwaka utaha.
Comments are closed.