gihugu cya Repubulika iharanira Demokarasi ya Kongo (RDC) ni cyo cyahawe uburenganzira bwo gutegura no kwakira imikino ihuza ibihugu bikoresha ururimi rw’igifaransa “Jeux de la Francophonie” izaba kuva tariki 19 kugeza 28 Kanama 2022.
Ubusanzwe iyi mikino yajyaga iba buri myaka 4 byari biteganyijwe ko izabera muri Canada umwaka utaha wa 2021 kuko iheruka yari yabereye muri Cote d’Ivoire muri 2017.
Tariki 10 Nyakanga 2020 nyuma y’inama y’ubuyobozi b’umuryango w’ibihugu bikoresha ururimi rw’igifaransa “OIF” yari iyobowe ku buryo bw’ikoranabuhanga n’umunyamabanga mukuru, Mushikiwabo Louise nibwo hemejwe ko imikino ihuza ibihugu bikoresha igifaransa izabera mu mujyi wa Kinshasa muri RDC. Iyi nama ikaba yarabaye tariki 08 na 09 Nyakanga 2020.
Minisitiri w’ubutwererane akaba anashinzwe n’ibikorwa bya “Francophonie” muri RDC, Pépin Guillaume Manjolo yemeje ko bazakira iyi mikino yo kugirana ibiganiro na Perezida w’igihugu, Félix Antoine Tshisekedi.
Iyi mikino “Jeux de la Francophonie” yatangiye gukinwa mu 1989 ikaba iba uri myaka 4. Umuryango w’ibihugu bikoresha ururimo rw’igifaransa “OIF” washinzwe mu 1970 ubu ukaba ugizwe n’ibihugu 88.
Bwa mbere iyi mikino yaberere muri Maroc mu 1989 naho iheruka yari ibaye ku nshuro ya 8 yabereye muri Cote d’Ivoire muri 2017 aho ari nayo yitabiriwe n’abantu benshi bagera ku bihumbi 4 baturutse mu bihugu 49.
Muri iyi mikino hakinwa imikino itandukanye irimo umupira w’amaguru, kunyonga igare, imikino ngororamubiri n’indi itandukanye ndetse hakabaho no kwerekana umuco wa buri gihugu binyuze mu mbyino n’ibindi.
Mu nshuro 8 iyi mikino imaze kuba, igihugu cy’u Bufaransa ni cyo kiyoboye aho kimaze kwegukana imidari 499 naho Canada ikaza ku mwanya wa 2 aho imaze kwegukana imidari 295. Maroc ni cyo gihugu cy’Afurika kiri hafi ku mwanya wa 3 aho kimaze kwegukana imidari 217.
Ku ruhande rw’u Rwanda rumaze kwitabira inshuro 5 (1989, 1997, 2005, 2009 na 2013) rwegukanye imidari 13.
