Urukiko rusesa imanza (Cour de cassation) rwo muri Repubulika ya Demokarasi ya Congo rwakatiye umunyapolitiki utavuga rumwe n’ubutegetsi igifungo cy’imyaka irindwi, nyuma yo guhamwa n’ibirego 12, birimo no gukwirakwiza ibihuha bitari ukuri no gutuka perezida.
Jean-Marc Kabund, w’imyaka 42, yari asanzwe afunze kuva mu kwezi kwa Kanama (8) mu mwaka ushize, ubwo yatabwaga muri yombi ashinjwa kunenga Perezida Félix Tshisekedi na guverinoma ye.
Radio Okapi y’Umuryango w’Abibumbye ikorera muri DR Congo yatangaje ko ibyo birego bishingiye ku byo Kabund yatangarije mu kiganiro n’abanyamakuru mu kwezi kwa Nyakanga (7) mu 2022.
Kabund yahoze ari visi perezida w’inteko ishingamategeko ya DR Congo. Yahoze ari n’inshuti ya hafi ya Perezida Tshisekedi, kugeza ubwo bashwanaga mu ntangiriro y’umwaka ushize.
Yaje gushinga ishyaka Alliance pour le Changement, yateganyaga kwifashisha mu kwiyamamaza mu matora ya perezida yo mu kwezi kw’Ukuboza (12) uyu mwaka.
Ntabwo ashobora kujuririra icyo cyemezo cy’urukiko rusesa imanza, kuko umwanzuro warwo ari wo wa nyuma kandi utajuririrwa.
Nyuma yo gukatirwa ku wa gatatu, umunyamategeko we Kadi Diko yagize ati: “Iki ni icyemezo gikakaye cyane, by’umwihariko kubera ko nta bujurire buhari.”
Yabwiye ibiro ntaramakuru Reuters ko Kabund yakatiwe amezi ane kuri buri kirego mu birego icyenda bya mbere, n’amezi 16 kuri buri kirego mu birego bitatu bya nyuma.
Comments are closed.