Igitego cyo ku munota wa nyuma cya Alphonse Davis yafashije Bayern Munich yo mu Budage kunganya na Celtic yo muri Écosse, ibona itike ya ⅛ cya UEFA Champions League.
Mu ijoro ryo ku wa Kabiri, tariki ya 18 Gashyantare 2025, ni bwo hakinwe imikino yo kwishyura
ya kamarampaka ya UEFA Champions League.
Umukino wari utengerejwe ni uwo Bayern Munchen yari yariyemo Celtic yo muri Écosse.
Umukino ubanza Bayern Munchen yari yatsinze Celtic yo muri Écosse ibitego 2-1.
Muri uyu mukino Celtic niyo yatangiye ishyiramo imbaraga nyinshi ishaka uko ikuramo ikinyuranyo cy’igitego kimwe cyarimo, igice cya mbere kirangira itarakibona nubwo yagerageje uburyo bubiri umukino ugitangira ntibugire icyo butanga.
Bayern Munich yari ifite ubusatirizi bukomeye nk’ibisanzwe yashatse igitego gikomeza kubura, harimo ubwo Harry Kane yahushije ku munota wa 22 na 45 n’ubwa Joshua Kimmich ku wa 38.
Mu gice cya kabiri abakinnyi b’umutoza Brendan Rodgers binyaye mu isunzu bashaka igitego cyabonetse ku munota wa 63, gitsinzwe na rutahizamu Nicolas-Gerrit Kühn.
Ibi byabaye nko gukangura intare yari isinziriye, bituma urubuga rw’amahina rwa Celtic rubura amahwemo kubera ba rutahizamu ba Bayern Munich bifuzaga kwishyura iki gitego hasi hejuru.
Cyabonetse ku munota wa nyuma w’umukino (90+4), ubwo habagaho kugundaguranira imbere y’izamu bikarangira umupira ushyizwe mu izamu na Alphonso Davies.
Andi makipe yakomeje muri iri joro ni Club Brugge KV yatsinze Atalanta ibitego 3-1, igakomeza ku kinyuranyo cya 5-2, dore ko mu mukino ubanza yari yatsinze 2-1.
AS Monaco itarahiriwe n’umukino ubanza igatsindwa 1-0, yagerageje kwihagararaho mu mukino wo kwishyura, iganya na Benfica ibitego 3-3, Ibi ntacyo byayifashije kuko yasezerewe mu irushanwa ku giteranyo cy’ibitego 4-3.
Feyenoord yasezereye AC Milan nyuma yo kuganya igitego 1-1, dore ko mu mukino ubanza yari yabonye intsinzi ya 1-0.
Imikino ya UEFA Champions League irakomeza gukinwa kuri uyu wa Gatatu, tariki ya 19 Gashyantare, hamenyekana amakipe ya nyuma ya ⅛, aho Real Madrid yakira Man City, Dortmund na Sporting, PSG na Brest ndetse na PSV na Juventus.
Comments are closed.