Ikipe ya FC Barecelona yo muri Espagne yagiranye amasezerano n’igihugu cya DRC yo kwamamaza ubukerarugendo bw’icyo gihugu bigakorerwa ku mipira yayo.
Repubulika iharanira Demokarasi ya Congo yemeye gutanga agera kuri miliyoni 46$ ku ikipe ya FC Barcelona kugira ngo iyo kipe ifite ibigwi bihambaye muri ruhago ijye yamamaza ubukerarugendo bw’icyo gihugu binyuze ku mipira y’abakinnyi b’iyo kipe.
Ayo masezerano yo ku itariki 29 z’ukwezi gushize kwa Kamena avuga ko “logo” igaragaza iki gihugu nka “umutima wa Afurika” kizaboneka inyuma ku myenda y’imyitozo y’amakipe y’abagabo n’abagore ya Barcelona.
Iyo ‘logo’ kandi izaboneka mu kwamamaza iyi kipe, muri magazine yayo no muri raporo y’umwaka y’iyi kipe, nk’uko ayo masezerano abivuga.
DR Congo izishyura hagati ya miliyoni 11$ na miliyoni 13$ ku mwaka mu gihe cy’imyaka ine y’aya masezerano.
Amakipe ya AS Monaco yo mu Bufaransa na AC Milan yo mu Butaliyani, na yo mu kwezi gushize yatangaje ko hari amafaranga yahawe na Leta ya Congo ngo ajye abamamaza binyuze mu myambaro.
Comments are closed.