Perezida Kagame yishimiye intsinzi Arsenal imbere ya Bayern Muchen

Perezida wa Repubulika Paul Kagame, yashimiye Arsenal FC yatsinze Bayern Munich 3-1 mu mukino w’umunsi wa gatanu wa UEFA Champions League wabereye kuri Emirates Stadium mu ijoro ryo ku wa Gatatu, tariki ya 26 Ugushyingo 2025

Umukuru w’Igihugu usanzwe ari umukunzi ukomeye w’iyi kipe yo mu majyaruguru y’i Londres mu Bwongereza, yabigaragarije mu butumwa yanyujije ku rubuga rwa X ubwo uyu mukino wari urangiye.

Ati: ”Arsenal iduteye ishema twese. Ni uko ni uko!”

Arsenal FC yari imbere y’abafana bayo, ku munota wa 22 yafunguye amazamu ku gitego cyatsinzwe na Julian Timber n’umutwe, ku mupira wari uvuye muri koruneri yatewe neza na Bukayo Saka.

Bayern Munich ntiyacitse intege kuko yakomeje gusatira. Joshua Kimmich yateye umupira muremure usaga Serge Gnabry awuhindura imbere y’izamu, usanga Lennart Karl yishyura igitego ku munota wa 32.

Igice cya mbere cyarangiye amakipe yombi anganyije igitego 1-1.

Arsenal FC yatangiranye igice cya kabiri imbaraga nyinshi, isatira bikomeye ariko uburyo bw’ibitego bwabonwaga na Mikel Merino na Bukayo Saka ntibubyare umusaruro.

Ku munota wa 61, Declan Rice yazamukanye umupira wenyine yihuta asigarana n’umunyezamu Manuel Neuer awuteye awukuzamo akuguru.

Ku munota wa 69’ Riccardo Calafiori yazamukanye umupira ku ruhande rw’ibumoso, awuhindura imbere y’izamu Noni Madueke atsinda igitego cya kabiri.

Iyi kipe yakinaga neza yatsinze igitego cya gatatu ku munota wa 77, ku mupira Gabriel Martinel yacomekewe mu kibuga hagati acenga umunyezamu Neuer wari wasohotse nabi, awushyira mu izamu.

Mu minota ya nyuma y’umukino, iyi kipe yo mu Budage yagerageje gusatira ishaka uko yishyura ibitego ariko biranga.

Umukino warangiye Arsenal itsinze Bayern Munchen ibitego 3-1, ihita ifata umwanya wa mbere ku rutonde rusange n’amanota 15.  

Indi mikino ybaye yasize Liverpool itsindiwe mu rugo na PSV ibitego 4-1, yuzuza umukino wa gatatu wikurikiranya itakaza mu marushanwa yose. 

Real Madrid na yo yatsinze Olympiacos ibitego 4-3 byose byatsinzwe na Rutahizamu Kylian Mbappé, Sporting CP Itsinda Club Brugge ibitego 3-0 Copenhagen na yo yatsinze Kairat ibitego 3-2.

Paris Saint Germain yatsinze Tottenham ibitego 5-3, Pafos inganya na AS Monaco ibitego 2-2,  Atlético Madrid Itsinda Inter Milan ibitego 2-1 ni mu gihe Atalanta yatsinze Frankfurt ibitego 3-0.

Umunsi wa gatanu wasize Arsenal FC yicaye ku mwanya wa mbere n’amanota 15, ikurikiwe na Paris Saint Germain, Bayern Munchen, Inter Milan na Real Madrid zifite amanota 12.

Borussia Dortmund ya gatandatu, Chelsea, Sporting, Manchester City na Atalanta zifite amanota 10. Ni mu gihe Liverpool iri ku mwanya wa 13 n’amanota icyenda, FC Barcelone ni iya 18 n’amanota arindwi.

Iyi mikino izongera gukomeza tariki ya 9 na 10 Ukuboza 2025 hakinwa Umunsi wa Gatandatu.