Umurwa mukuru wa Ghana, Accra, uhanganye n’imyuzure ikomeye inyuma y’imvura nyinshi yaraye iguye mu ijoro ryakeye rishyira kuri uyu wa mbere.
Amashusho na videos ziriwe zicicikana ku mbuga nkoranyambaga zerekana amazu n’imodoka byarengew n’amazi. Amakuru avuga ko uduce turi ahantu h’imirambi cyangwa munsi y’imisozi ari two twibasiwe cyane n’imyuzure, ibi bikaba byatumye urujya n’uruza rw’abantu n’ibintu rutari gushoboka.
Benshi mu bagizweho ingaruka bariho baratabaza kubera bamwe muri bo baheza mu mazu yabo n’ubwo kugeza ubu ata muntu aramenyekana ko yapfuye, amazu menshi n’ibikorwaremezo byangiritse bikabije.
Iyo myuzure yatumye kandi yateje inkongi y’umuriro mu ruganda rukora za ‘caoutchouc’ ruri hafi y’ihuriro ry’imihanda ruzwi nka ‘Kwame Nkrumah Circle’ ku murwa mukuru Accra, ariko amakuru avuga ko abashinzwe ubutabazi bariho baragerageza kuzimya uwo muriro mu gihe abategetsi bavuga ko imyuzure yatumye imihanda imwe n’imwe yo mu murwa mukuru itaba nyabagendwa, si ibyo gusa kuko iyo myuzure yatumye amashanyarazi abura mu duce tutari duke tw’umurwa mukuru Accra.
Leta yatangaje ko Polisi, igisirikare, abashinzwe kuzimya umuriro, ikigo cyigihugu gishinzwe ibijyanye no gukumira ibiza hamwe n’izindi nzego z’ubutabazi, bose bari gukurikiranira hafi uko ibintu bimeze ndetse leta yiteguye gufasha abaturage bari mu kaga.
Itangazo ry’ibiro by’umukuru w’igihugu ryahamagariye abaturage bari mu kaga kwimukira ahatekanye, bakava mu manegeka. Iryo tangazo risaba kandi abashoferi kwirinda guca mu mabarabara yatewe n’imyuzure.
Umurwa mukuru wa Ghana ukunze kwibasirwa n’imyuzure bya hato na hato, ariko benshi bavuga ko uyu mwuzure waje utandukanye n’indi iherutse kuko yo yari ifite imbaraga nyinshi ndetse ukaba wangije ibitari bike.
Ikigo gishinzwe iteganyagihe muri icyo gihugu cyaburiye abaturage bo mu murwa mukuru Accra ko bakwiye kwirinda kuko ikirere muri iyi minsi kigaragara nk’ikiremereye mu buryo budasanzwe, ndetse ku bw’ibyo mu minsi itari iya kera hashobora kongera kuba umwuzure, bityo ko abatuye mu bice by’amanegeka bakwiye kwihutira kuhava vuba na bwangu.
