Umuyobozi w’Akarere ka Huye, Bwana Sebutege Ange, yakiriye inama yahuje Abanya Uganda baba mu Ntara y’Amajyepfo n’Ambasade ya Uganda mu Rwanda, ni inama yari igamije guteza imbere ubucuruzi, ishoramari n’imikoranire mu by’ubukungu.
Iyi nama yabaye kuri uyu wa gatandatu taliki ya 15 Kanama 2026 itegurwa n’Ambasade ya Uganda mu Rwanda, ihuza abaturage ba Uganda batuye cyangwa bakorera mu Ntara y’Amajyepfo, ikaba yibanze ku guteza imbere umubano w’ubucuruzi n’ubukungu hagati y’abaturage b’ibihugu byombi.
Iyo nama yari ifite insanganyamatsiko igira iti “Promoting Diaspora Trade and Economic Dialogue”, bisobanuye “Guteza imbere ubucuruzi bw’ababa hanze y’igihugu n’ibiganiro ku bukungu.”
Mu butumwa bwatanzwe na Meya Sebutege, yavuze ku mahirwe ahari mu bijyanye n’ubucuruzi, ishoramari ndetse n’ubufatanye mu by’ubukungu, ashimangira akamaro ko gukomeza ibiganiro bishobora gufasha guteza imbere ibikorwa by’ubucuruzi hagati y’abaturage b’u Rwanda na Uganda.
Ibi biganiro byahaye Abagande baba mu Ntara y’Amajyepfo umwanya wo gusobanukirwa no kuganira ku mahirwe ashobora kubafasha mu bucuruzi no gushora imari, ndetse no ku buryo ubufatanye bw’ibihugu byombi bushobora kurushaho gutezwa imbere.
Ubutumwa bw’Akarere ka Huye bugaragaza ko gukomeza ibiganiro nk’ibi bishobora kugira uruhare mu guteza imbere ubucuruzi, ishoramari n’imikoranire mu by’ubukungu hagati y’u Rwanda na Uganda.
