Rutahizamu w’Ikipe y’Igihugu ya Argentine akaba n’umunyabigwi mu mupira w’amaguru ku Isi, Lionel Messi, yamuritse umwambaro wihariye azambara ku mukino wa nyuma azakinira igihugu cye.
Mu ijoro ryo ku wa Mbere, tariki ya 21 Nzeri 2026, ni bwo uyu mukinnyi yashyize hanze amashusho y’uyu mwambaro, awukurikiza amagambo agira ati :“Umukino wa nyuma. Umwambaro w’ibihe byose.”
Biteganyijwe ko umukino wa nyuma Messi azakina mu Ikipe y’Igihugu ya Argentine, uzaba ku itariki ya 6 Ukwakira 2026, ubwo izaba ihura na Bénin mu mukino wa gicuti.
Ni umukino wahujwe n’ibirori byo gusezera kuri uyu mukinnyi wafashije igihugu cye kwandika amateka atandukanye mu mupira w’amaguru ku Isi.
Umukino wa Argentine na Bénin uzabera kuri Estadio Monumental i Buenos Aires, yakira abafana ibihumbi 85.
Watumiwemo abakinnyi bafashije Argentine kwegukana Igikombe cy’Isi cya 2022, dore ko Perezida w’Ishyirahamwe rya Ruhago muri Argentine, Claudio Tapia, yavuze ko “uzaba ari umunsi utazibagirana”.
More Read
Mu gihe abandi bazaba bambaye umwambaro usanzwe w’imikino Argentine yakiriye, Messi azaba yambaye undi wihariye, ujya gusa na yo ariko amazina ye na nimero ye biri mu ibara risa na Zahabu.
Messi yatangaje ko asezeye muri iyi kipe muri Kanama, nyuma y’uko igihugu cye gitsinzwe na Espagne ku mukino wa nyuma w’Igikombe cy’Isi cya 2026. Icyo gihe kandi yavuze ko ari gutekereza ku hazaza he muri ruhago nyuma y’urupfu rwa se, Jorge.
Uyu mukinnyi w’imyaka 39, yavuze ko icyemezo cyo guhagarika gukinira ‘Albiceleste’ cyamubabaje cyane, ariko yari yaratanze ibyo yari afite byose kandi ko nta kindi yari asigaranye cyo gutanga.
More Read
Ni we umaze gutsindira Argentine ibitego byinshi ndetse akaba ari na we wayikiniye imikino myinshi kurusha abandi. Yatsinze ibitego 125 mu mikino 207.
Messi wegukanye Ballon d’Or umunani akaba ari no mu bahataniye iya 2026, kuri ubu akinira Inter Miami yo muri Leta Zunze Ubumwe za Amerika.
