Ikipe ya Manchester United yatandukanye n’umutoza wayo Michael Carrick, nyuma y’umusaruro utari mwiza yakomeje kugaragaza muri Shampiyona y’u Bwongereza (Premier League).
Carrick ayisize ku mwanya wa 18 ku rutonde rwa shampiyona, nyuma y’imikino 10 imaze gukina, aho yabashije gutsindamo umukino umwe gusa. Uyu musaruro mubi ni wo watumye ubuyobozi bw’iyi kipe bufata icyemezo cyo gutandukana na we.
Mu gihe Manchester United ishaka umutoza wayifasha kuva muri ibi bihe bitoroshye no kongera guhatanira imyanya myiza muri shampiyona, Umunya-Argentine Mauricio Pochettino ni umwe mu mazina ari kuvugwa nk’ushobora gusimbura Carrick.
Pochettino, usanzwe utoza Ikipe y’Igihugu ya Leta Zunze Ubumwe za Amerika, afite ubunararibonye mu mupira w’amaguru w’u Bwongereza, aho yatoje amakipe akomeye arimo Tottenham Hotspur na Chelsea.
Uyu mutoza ashobora kuba umwe mu bahabwa amahirwe yo guhabwa izi nshingano, mu gihe Manchester United yaba ishaka kongera kubaka ikipe ishobora guhatanira ibikombe no gusubira mu makipe ahatanira imyanya ya mbere muri Premier League.
