Kuri iki iki Cyumweru, ikipe y’Igihugu y’u Rwanda, Amavubi, yabonye itike yo gukina igikombe cya Afurika ku bakinnyi bakina imbere mu gihugu (CHAN 2024), nyuma yo gutsinda Sudani y’Epfo 2-1 ku wa 28 Ukuboza 2024, ariko hagategerezwa itangazo rya CAF.
Nyuma yo gutsinda Sudani y’Epfo ibitego 2-1 mu mukino wo kwishyura kuri Stade Amahoro, ntabwo byari bisobanutse niba Amavubi abonye itike dore hari hagitegerejwe icyo Impuzamashyirahamwe y’Umupira w’Amaguru muri Afurika ibivugaho, yewe ubwo umutoza Jimmy Mulisa yabazwaga igikurikira yavuze ko bagiye gukina babizi ko badafite itike, ariko hakiri amahirwe macye no gusenga kuko hari ibihugu byiganjemo iby’Abarabu bitazitabira.
Iyi nkuru nziza yari itegerejwe n’Abanyarwanda nk’itunguranye, yasohotse kuri iki Cyumweru, ubwo ku rubuga rwa murandasi rw’Impuzamashyirahamwe y’umupira w’Amaguru, hashyirwagaho inkuru igaruka ku mikino yabaye ku wa Gatandatu, maze ku musozo wayo hagashyirwaho amakipe amaze kubona itike kugeza ubu arimo n’u Rwanda.
Uretse Amavubi ibindi bihugu byamaze kubona itike byiyongera kuri Tanzania, Uganda na Kenya zizakira iri rushanwa ni Angola, Burkina Faso, Central Africa Republic, Guinea, Niger, Nigeria, Rwanda, Senegal, Sudan na Zambia.
Amavubi yaherukaga gukina iri rushanwa mu 2021 aho yagarukiye muri 1/4, mu gihe muri 2022 atagiyeyo kuko yasezerewe mu rugo na Ethiopia. CHAN 2024 izakinwa hagati y’itariki 1 na 28 Gashyantare 2025.
Comments are closed.