Akanama k’Umuryango w’Abibumbye gashinzwe Umutekano ku Isi (UNSC), binyuze muli Komite yacyo ishinzwe Ibihano (Komite 1533), kashyize ku rutonde rw’abafatirwa ibihano abantu batandatu (6) n’indi mitwe ifite uruhare mu guhungabanya umutekano mu Burasirazuba bwa Repubulika Iharanira Demokarasi ya Kongo (RDC).
Muri abo bafatiwe ibihano kuri uyu wa Kane, tariki ya 16 Nyakanga 2026, harimo by’umwihariko Corneille Nangaa, wahoze ari Perezida wa Komisiyo y’Igihugu y’Amatora muri RDC (CENI), ubu akaba ari we muyobozi mukuru w’ihuriro rya gisirikare n’amapolitiki rya Alliance Fleuve Congo (AFC), ryunze ubumwe n’umutwe wa M23.
Corneille Nangaa, wayoboye amatora yo mu mpera za 2018 yagejeje Felix Tshisekedi ku butegetsi, yaje gutangiza ku mugaragaro ihuriro rya AFC mu mpera z’umwaka wa 2023. Iri huriro ryahise ryihuza n’umutwe wa M23 ndetse n’indi mitwe yitwaje intwaro irwanira mu burasirazuba bwa RDC.
Loni ivuga ko Nangaa n’umutwe we wa AFC bagira uruhare ruziguye mu gukongeza intambara, guhungabanya umutekano, no guteza ibyago n’imvururu mu baturage b’abasivile muri Kivu y’Amajyaruguru n’Intara zihana imbibi nayo.
Ibihano byafashwe bivuze iki?
Ibi bihanorufatiro by’Akanama k’Ibihano ka 1533 kagendeye ku miterere y’ikibazo cy’Uburasirazuba bwa RDC, bikubiyemo ingamba zikomeye zizahungabanya ibikorwa by’aba bayobozi.
Ibihano byafatiwe aba bayobozi harimo Gufatira imitungo yose n’amafaranga by’aba bantu n’iyi mitwe ahantu hose ku isi hashobora kugera ukuboko kwa Loni cyangwa ibihugu binyamuryango, Kubuzwa gukora ingendo (Travel Ban) mpuzamahanga cyangwa kunyura mu bihugu binyamuryango bya Loni.
Kubuza umuntu wese cyangwa igihugu icyo aricyo cyose guha, kugurisha, cyangwa kugezaho intwaro n’ibikoresho bya gisirikare aba bantu n’iyi mitwe bafatiwe ibihano.
Ibi bihano bije mu gihe mu gihugu cya RDC hakomeje imirwano ikomeye hagati y’ingabo za leta (FARDC) n’abo bafatanyije ku ruhande rumwe, ndetse n’umutwe wa M23 ufatanyije na AFC ku rundi ruhande.
