Komisiyo y’Imiyoborere, Uburinganire n’Ubwuzuzanye bw’Abagabo n’Abagore mu Nteko Ishinga Amategeko yakiriye Minisitiri w’Ubutegetsi bw’Igihugu, Dominique Habimana, bagirana ibiganiro ku ishyirwa mu bikorwa rya Politiki y’Igihugu yo Kwegereza Ubuyobozi n’Ubushobozi Abaturage, yatangiye gushyirwa mu bikorwa mu w’i 2001.
Ibi biganiro byibanze ku mavugurura yakozwe muri iyi gahunda mu bihe bitandukanye, agamije kunoza imiyoborere, kongera ubushobozi bw’inzego z’ibanze no kurushaho kwegera abaturage mu gutanga serivisi no kubafasha kugira uruhare mu bibakorerwa.
Minisitiri Habimana yagaragaje ko imwe mu mpinduka zikomeye zakozwe muri iyi politiki ari ukuvugurura imiterere y’inzego z’ubuyobozi, hagamijwe koroshya imikorere yazo no kunoza uburyo bwo guhuza ibikorwa by’iterambere.
Mu gihe cy’icyiciro cya kabiri cy’iyi gahunda, cyabaye hagati ya 2006 na 2011, habaye impinduka zikomeye mu mbibi n’imiterere y’inzego z’ubuyobozi bw’ibanze. Uturere twagabanyijwe tuva kuri 106 tugera kuri 30, Imirenge iva kuri 1.545 igera kuri 416, naho Utugari tuva kuri 9.165 tugera kuri 2.148. Hanashyizweho imidugudu nk’urwego rw’ibanze rworohereza abaturage kwishyira hamwe no gukemura ibibazo bibegereye.
Iri vugurura ryari rigamije kugabanya inzego nyinshi z’ubuyobozi, kunoza imikoreshereze y’umutungo wa Leta, kongera imbaraga mu gutegura no gushyira mu bikorwa gahunda z’iterambere, ndetse no gutuma serivisi zitangwa mu buryo bwihuse kandi bwegereye abaturage.
Politiki yo kwegereza abaturage ubuyobozi n’ubushobozi kandi igamije kongera uruhare rw’abaturage mu ifatwa ry’ibyemezo bibareba, kubaha ubushobozi bwo kwihitiramo ibyihutirwa mu iterambere ry’aho batuye no kubaka inzego z’ibanze zishobora kubazwa inshingano ku byo zikorera abaturage.
Mu myaka yakurikiyeho, iyi politiki yakomeje kuvugururwa. Icyiciro cya gatatu, cyatangiye mu 2012 kugeza mu 2017, cyibanze ku kongerera inzego z’ibanze ubushobozi, kuvugurura amategeko n’imikorere yazo no gushimangira uruhare rw’abaturage mu gukurikirana ibikorwa by’ababayobora. Politiki yongeye kuvugururwa mu 2021, hagamijwe kugira inzego z’ibanze zifite ubushobozi n’ubwigenge birushijeho, kugira ngo zibashe kwihutisha iterambere ry’imibereho n’ubukungu.
Raporo ya Minisiteri y’Ubutegetsi bw’Igihugu (MINALOC) yasuzumye umusaruro w’iyi politiki mu myaka 25, kuva mu 2000 kugeza mu 2025, igaragaza ko yatanze umusanzu mu kongera uruhare rw’abaturage mu ifatwa ry’ibyemezo, guteza imbere imiyoborere ishingiye ku kubazwa inshingano no kunoza itangwa rya serivisi.
Iyi raporo igaragaza kandi ko hakiri imbogamizi zirimo umuvuduko ukiri muto mu kwegereza abaturage serivisi zimwe na zimwe, ubushobozi buke bw’ingengo y’imari mu nzego z’ibanze, ibura ry’abakozi bafite ubumenyi bukenewe ndetse n’ibibazo bijyanye no gukurikirana no gusuzuma ibikorwa by’iterambere.
Ibiganiro Minisitiri Habimana yagiranye na Komisiyo y’Imiyoborere, Uburinganire n’Ubwuzuzanye bw’Abagabo n’Abagore byabaye mu rwego rwo gusuzuma aho iyi politiki igeze ishyirwa mu bikorwa, kureba impinduka yagiye izana no kurebera hamwe ibikwiye gukomeza kunozwa kugira ngo intego yayo yo kugeza ubuyobozi na serivisi ku baturage irusheho kugerwaho.
