Kenya: Mu gihe urukiko rutaranzura ku kirego cye, Raila Odinga arasaba ko perezida wa komisiyo y’amatora atabwa muri yombi

910

Umunyepolitiki Raila Odinga wari uhagarariye Impuzamashyaka Azimio la Umoja mu matora ya Perezida wa Kenya, yasabiye Perezida wa Komisiyo y’amatora, Wafula Chebukati gutabwa muri yombi.

Odinga yavuze ko Wafula Chebukati adakwiye gukomeza kuyobora komisiyo y’amatora ahubwo akwiye gutabwa muri yombi agafungwa kuko yibye amajwi.

Ubwo Odinga yari imbere y’imbaga muri Kakamega yagiye gushyigikira umukandida wa Azimio, Fernandez Barasa, yashinje Chebukati kutagira ubushobozi bwo kuyobora amatora y’umukuru w’igihugu.

Ati “Birababaza kubona abatora birirwa ku murongo umunsi wose ngo batore, ariko umuntu umwe wicaye i Nairobi akajyana amatora uko abyifuza”.

Yakomeje ati “Mvuga ko abantu nk’aba badakwiye guhagararira amatora, bafatwe bashyirwe muri gereza. Ibyo bakoze birenze ukwemera.”

Odinga yakomeje avuga ko yizeye ko mu minsi mike azatangazwa nka Perezida wa Kenya.

Mu cyumweru gishize, Odinga yatanze ikirego mu Rukiko rw’Ikirenga avuga ko atemera ko yatsinzwe na Dr William Ruto.

Amatora y’Umukuru w’Igihugu muri Kenya yabaye ku wa 9 Kanama 2022, aho Dr William Ruto wahoze ari Visi Perezida wa Kenya yatsinze Raila Odinga bari bahanganye.

Ku rundi ruhande ariko, ubwo hari hamaze gutangazwa uwatsinze, Raila Odinga yahise atangaza ko atemeranya n’ibyavuye mu matora ndetse ku wa 22 Kamama, yashyikirije ikirego Urukiko rw’Ikirenga arusaba gutesha agaciro intsinzi ya Dr Ruto.

Email yanyu ntaho izigera igiragazwa