Bwana Tuyishimire Placide bakunze kwita Trump na komite ye yose bamaze kwandikira ubuyobozi bw’Akarere ka Musanze ko beguye ku nshingano zabo zo kuyobora ikiope ya Musanze FC.
Amakuru atugeraho aravuga ko Bwana Tuyishimire Placide wamenyekanye cyane nka Trump amaze kwegura ku buyobozi bw’ikipe ya Musanze FC, akaba amaze gushyikiriza urwandiko Akarere, urwandiko ruvuga ko we na komite bari bafatikanije mu kuyobora ikipe Musanze FC batagishoboye kuyobora iyo kipe.
Mu rwandiko dufitiye kopi, Bwana Placide yashyize hanze impamvu eshatu z’ingenzi zitumye we na komite yari ayoboye begura.
Placide na komite ye imaze kwegura, bavuze ko bakurikije ingengo y’imali Akarere kageneye iyo kipe bitashoboka ko babasha kurangiza umwaka w’imikino utaha, Trump yongeye avuga ko bamaze igihe kinini bakoresha amafranga yabo ku ikipe ya Musanze FC kandi ntihagire undi ubafasha bityo ko batakomeza gukorera mu gihombo.
