Muhire Kevin yerekeje mu yindi kipe asiga Rayon mu kangaratete

Bwana Muhire Kevin wari kapiteni wa Rayon sport, yateye iyo kipe umugongo yerekeza muri Sudan y’Epfo mu ikipe ya Jamusi SC.

Ikipe ya Jamus SC yo mu gihugu cya Sudan y’Epfo yemeje ko imaze kugura uwari kizigenza wa Rayon Sport Bwana Muhire Kevin, ndetse isaba abakunzi bayo kuza kwitabira ibirori byo kumwakira ku kibuga cya Juba.

Muhire Kevin wafatwaga nk’umwana w’ikipe, yerekeje mu ikipe ya Jamus SC nyuma y’uko amasezerano y’umwaka yari afitanye na Rayon Sport arangiye impande zombi zanga kuyakomeza.

Iyi kipe ya Jamus SC izitabira imikino Nyafurika CAF Champions League 2025/26 nyuma yo kwegukana igikombe cya Shampiyona, uyu mugabo w’Umunyarwanda akaba ayisinyiye umwaka umwe gusa.

Muhire Kevin w’imyaka 26 y’amavuko, biteganijwe ko agera ku kibuga mpuzamahanga cya Juba kuri uyu wa gatanu.

Si ubwa mbere agiye gukina hanze y’u Rwanda kuko yaherukaga muri Al Yarmouk ikina mu cyiciro cya kabiri muri Kuwait. Yakinnye kandi Misr lel-Makkasa yo mu Misiri na Saham Club yo muri Oman.