RSSB Tigers yanditse amateka i Beijing, ibona intsinzi ya mbere muri FIBA Intercontinental Cup 2026

Ikipe ya RSSB Tigers ihagarariye u Rwanda n’Umugabane wa Afurika mu Irushanwa Mpuzamigabane rya Basketball rya FIBA Intercontinental Cup 2026, yabonye intsinzi yayo ya mbere nyuma yo gutsinda Shanghai Sharks yo mu Bushinwa amanota 117-115 mu mukino wari ukomeye cyane warangiye hifashishijwe iminota y’inyongera.

Uyu mukino wabereye i Beijing mu Bushinwa kuri uyu wa Gatatu mu masaha y’igitondo cya hano mu Rwanda, waranzwe no guhangana gukomeye hagati y’amakipe yombi, aho buri ruhande rwashakaga amahirwe yo gukomeza kwitwara neza muri iri rushanwa rihuza amakipe yabaye aya mbere ku migabane itandukanye.

Shanghai Sharks yatangiye umukino ifite imbaraga nyinshi, itsinda agace ka mbere ku manota 30 kuri 17 ya RSSB Tigers. Mu gace ka kabiri, iyi kipe yo mu Bushinwa yakomeje kwerekana urwego rwiza, itsindamo amanota 30 mu gihe RSSB Tigers yabonye 29, bituma ikomeza kuyobora umukino.

Nyuma y’ikiruhuko, RSSB Tigers yagarutse mu kibuga ifite inyota yo kugabanya ikinyuranyo. Agace ka gatatu karangiye amakipe yombi anganya amanota 25-25, ibintu byatumye umukino ukomeza kuba urimo ihangana rikomeye.

Mu gace ka nyuma, RSSB Tigers yazamuye urwego rw’imikinire ku buryo bugaragara, itsindamo amanota 32 kuri 18 ya Shanghai Sharks. Ibyo byatumye iminota 40 isanzwe irangira amakipe yombi anganya amanota 103-103, bityo hitabazwa iminota itanu y’inyongera kugira ngo haboneke ikipe itsinda.

More Read

Ikipe y’u Rwanda RSSB yahuye n’uruva gusenya mu mukino wa mbere wa FIBA Intercontinental Cup

Menya byinshi ku mwambaro Lionel Messi azambara ku mukino we wa nyuma akinira Argentine

Ikipe ya Liberia “Lone Stars’ izacakirana n’Amavubi yageze i Kigali

Mutsinzi Ange yavuze ko we na begenzi be bizeye gutsindira Liberia mu Rwanda

Muri iyo minota y’inyongera, RSSB Tigers yakomeje kwitwara neza, ibona amanota 14 mu gihe Shanghai Sharks yabonye 12, bituma umukino urangira iyi kipe yo mu Rwanda yegukanye intsinzi y’amateka ku manota 117-115.

Mu bakinnyi bitwaye neza muri uyu mukino, Brandon Godwin wa Shanghai Sharks ni we wabaye umukinnyi watsinze amanota menshi, agera kuri 37. Ku ruhande rwa RSSB Tigers, Craig Randall II yigaragaje cyane atsinda amanota 30, agira uruhare rukomeye muri iyi ntsinzi.

Iyi ntsinzi ije nyuma y’uko RSSB Tigers yari yatangiye iri rushanwa nabi, itsindwa na Rytas Vilnius yo muri Lithuania amanota 107-89 mu mukino wabaye ku wa 22 Nzeri 2026.

More Read

Joy-Lance Mickels yasabye Abanyarwanda kuza gushyigikira AMAVUBI mu mukino uzayahuza na Liberia

U Rwanda rwerekeje muri Côte d’Ivoire mu Gikombe cya Afurika cya Handball U-18

Samuel Eto’o yasabye Afurika gushyigikira Infantino mu matora ya FIFA

Argentine: Imikino yose izahagarara mu guha icyubahiro Lionel Messi

Nyuma y’uyu musaruro mwiza, RSSB Tigers izategereza ibizava mu mukino uzahuza Rytas Vilnius na Shanghai Sharks kugira ngo hamenyekane amahirwe yayo yo gukomeza muri 1/2 cy’irangiza.

Mu Itsinda A, amakipe abiri ya mbere ni yo azabona itike ya 1/2, aho azisanga ayazava mu Itsinda B rigizwe na Beijing Royal Fighters yo mu Bushinwa, Boca Juniors yo muri Argentine ndetse na NBA G League United yo muri Leta Zunze Ubumwe za Amerika.

Iri rushanwa rya FIBA Intercontinental Cup 2026 rizakomeza kugeza ku wa 27 Nzeri 2026, aho amakipe azaba atageze muri 1/2 azahatanira imyanya yo hasi mu rwego rwo gusoza irushanwa ku mwanya mwiza ushoboka.