Imwe mu makipe yagarutswaho cyane mu mezi atatu ashize, kubera uburyo yitwaye mu Gikombe cy’Isi cyaberaga muri Leta Zunze Ubumwe za Amerika, Canada na Mexique, ari yo Cap-Vert, igiye guhura n’Amavubi y’u Rwanda mu mukino benshi bahanze amaso ku mugoroba wo kuri uyu wa 29 Nzeri 2026.
Uretse abafana bayo bavugishije benshi, Cap-Vert yari mu bihugu byitabiriye iri rushanwa bwa mbere yabaye imwe mu makipe yagarutsweho cyane ubwo yanganyaga na Espagne mu mukino wa mbere mu gihe kandi yari mu nzira zo gusezerera Argentine ya Lionel Messi, ariko iki gihugu cyari gifite irushanwa riheruka kigatabarwa n’iminota 30 y’inyongera.
Umukino uhuza Cap-Vert n’u Rwanda kuri uyu wa Kabiri, tariki ya 29 Nzeri 2026, ni uw’Umunsi wa Kabiri mu Itsinda K ryo gushaka itike y’Igikombe cya Afurika cya 2027.
Ibihugu byombi bigiye kongera guhura nyuma y’imyaka itandatu, aho byari kumwe mu rugendo rwo gushaka itike ya CAN 2021. Gusa imikino yombi yabihuje mu 2020 yarangiye nta gitego kiyibonetsemo.
Umukino wo kuri uyu wa Kabiri usanze amakipe yombi atandukanye cyane n’uko yari ameze mu myaka itandatu ishize. U Rwanda rumaze igihe mu rugendo rwo kuvugurura ikipe yarwo, mu gihe Cap-Vert yo yazamutse ikagera ku rwego rwo guhangana n’amakipe akomeye muri Afurika ndetse ikaba iheruka mu Gikombe cy’Isi.
More Read
Mu 2020, Amavubi na Cap-Vert byahuriye mu Itsinda F ryo gushaka itike ya CAN 2021. Imikino ibiri yabaye hagati y’aya makipe yarangiye ari ubusa ku busa.
Umukino ubanza wabereye i Praia muri Cap-Vert ku wa 12 Ugushyingo warangiye ari 0-0, mbere y’uko amakipe yombi yongera kunganya ku mukino wo kwishyura wabereye kuri Stade ya Kigali ku wa 17 Ugushyingo 2020.
