Abashoramari 16 bo muri Singapore bageze mu Rwanda gushakisha amahirwe y’ishoramari n’ubufatanye mu ikoranabuhanga

Abashoramari n’abayobozi b’ibigo by’ubucuruzi 16 byo muri Singapore bageze mu Rwanda mu ruzinduko rw’akazi ruzamara ibyumweru bibiri, rugamije gusuzuma amahirwe y’ubucuruzi n’ishoramari ari mu gihugu ndetse no gushimangira ubufatanye mu nzego zitandukanye z’iterambere.

Iri tsinda rigizwe n’abayobozi b’ibigo bikorera mu nzego zifatiye runini ubukungu n’iterambere ry’ahazaza, zirimo ikoranabuhanga ry’ubwenge buhangano (Artificial Intelligence), ikoranabuhanga rikoreshwa mu buhinzi, uburezi, ubuvuzi, iby’indege, ikoreshwa rya robots, ibijyanye n’ingabo n’umutekano rusange, ndetse n’imicungire y’ishoramari n’izindi serivisi zigezweho.

Muri uru ruzinduko, aba bashoramari bazahura n’abayobozi b’inzego za Leta n’abikorera, basura ibikorwa by’iterambere bitandukanye ndetse banaganire ku buryo hashyirwaho ubufatanye bushya bushobora kuvamo ishoramari rifatika n’imishinga y’iterambere ifitiye inyungu impande zombi.

U Rwanda rumaze igihe rushyira imbaraga mu guteza imbere ubukungu bushingiye ku bumenyi n’ikoranabuhanga, by’umwihariko mu nzego zirimo ikoranabuhanga mu itumanaho, ubuzima, uburezi n’ubuhinzi. Ni muri urwo rwego uru ruzinduko rufatwa nk’intambwe ikomeye mu gukomeza gukurura ishoramari rishingiye ku guhanga udushya no kwimakaza ikoreshwa ry’ikoranabuhanga rigezweho.

Byitezwe kandi ko uru ruzinduko ruzafasha aba bashoramari gusobanukirwa neza n’amahirwe ari mu Rwanda, by’umwihariko ajyanye n’ibyo igihugu cyihaye nk’intego mu rugendo rwo kwihutisha iterambere rirambye no guhanga imirimo mishya ishingiye ku ikoranabuhanga.

More Read

Kayonza: Abanyamuryango ba FPR-Inkotanyi bashimiwe uruhare rwabo mu kwihutisha iterambere ry’abaturage

Perezida Kagame yagaragaje ko Afurika ikwiye kugira uruhare mu ifatwa ry’ibyemezo bijyanye n’isanzure

Ubwoba ni bwose kubera ”Imigiho mishya ” mu burezi

Banki y’Isi yemereye u Rwanda miliyari 145,7 Frw yo kunoza ikusanywa ry’imisoro no guhanga imirimo

Abasesenguzi mu by’ubukungu bagaragaza ko ubufatanye hagati y’u Rwanda na Singapore bushobora gutanga umusaruro ukomeye, bitewe n’uko Singapore ari kimwe mu bihugu byateye imbere cyane mu ikoranabuhanga, guhanga udushya no gukurura ishoramari, mu gihe u Rwanda na rwo rukomeje kwiyubaka nk’ihuriro ry’ubucuruzi n’ikoranabuhanga ku mugabane wa Afurika.

Byongeye kandi, uru ruzinduko rwitezweho guteza imbere ihererekanyabumenyi, gusangira ubunararibonye no kongerera ubushobozi inzego zitandukanye z’u Rwanda binyuze mu bufatanye mu ikoranabuhanga n’ishoramari. Ibi bishobora gufasha igihugu gukomeza urugendo rwo kubaka ubukungu buhangana ku rwego mpuzamahanga kandi bushingiye ku guhanga udushya.

Uru ruzinduko ruje mu gihe u Rwanda rukomeje kwagura umubano n’ibihugu bitandukanye byo ku isi hagamijwe kongera amahirwe y’ishoramari, ubucuruzi no guteza imbere ikoranabuhanga rifasha mu kuzamura imibereho y’abaturage no kwihutisha iterambere ry’igihugu.

More Read

Intambwe ya nyuma iganisha mu gutanga indangamuntu y’ikoranabuhanga yatewe

Musanze: Kiliziya Gatolika Diyoseze ya Ruhengeri yegereje ababyeyi Ishuri ry’Icyerekezo

Abahinzi n’aborozi bamaze gushumbushwa asaga miliyari 7 Frw kuva 2019.

Igiciro cy’amashanyarazi kigiye kuvugururwa nyuma y’imyaka 5