Nyuma y’aho ikipe ya Arsenal inyagiye ikipe ya Chelsea, iyi kipe yongeye ikubitira mu igunira ikipe ya Manchester United biyongerera amahirwe yo kuba mu makipe ane meza (Big4)
Championnat y’umupira w’amaguru mu gihugu cy’Ubwongereza yakomeje kuri uyu wa gatandatu, nubwo bwose amakipe abiri (Liverpool na Manchester City) akomeje kuryana isatabirenge mu guhanganira umwanya wa mbere w’iyo championnat, andi makipe arimo ay’ibigugu yo ari guhatanira kuba muri ane meza (Big 4), mu gihe andi nayo ari guhatana ngo atamanuka mu cyiciro cya kabiri.
Kuri uyu wa gatandatu taliki ya 23 Mata 2022, muri ayo makipe ari guhatanira kujya muri ane meza, ikipe ya Arsenal iherutse kwisengerera ikipe ya Chelsea iyinyabika ibitego bitatu byose, yagombaga gucakirana na Manchester United ku munsi wa 34 w’iryo rushanwa, ikipe ya Arsenal birangira itsinze Manchester United ibitego bitatu kuri kimwe (3-1), bituma Arsenal igira amanota 60, intsinzi yatumye imibare yo kuba muri ane meza yoroha.
Ibitego bya Arsenal byatsinzwe na Nuno Tavares (3’), Bukayo Saka (32’) na Granit Xhaka (70’) mu gihe igitego rukumbi cya Manchester United cyatsinzwe na Cristiano Ronaldo (34’).
Ni umukino utoroheye Manchester United kuko yinjijwe igitego hakiri kare ku munota wa gatatu, igitego cyatsinzwe na Nuno Tavares.
Bukayo Saka yazamukanye umupira awutera imbere y’izamu uhushwa na Alex Telles kimwe na Raphael Varane birangira David De Gea awukuyemo ariko awuganisha ahari Nuno Tavares.
Manchester United bari bakoze impinduka bazana Victor Lindolf ajya mu mwanya wa Harry Maguire mu mutima w’ubwugarizi mu gihe Cristiano Ronaldo yari yagarutse.
Mu buryo bwo gukina, ntabwo Manchester United yabashaga kubonana hagati mu kibuga hakinaga Nemanja Matic na Scott McTomminay.
Kugaruka kwa Cristiano Ronaldo utarakinnye umukino wa Liverpool nyuma yo gupfusha umwana, cyari igisubizo gitanga agahenge ku bafana ba Manchester United.
Arsenal yabaye nziza mu kwihutisha imipira iva hagati igana mu rubuga rwa Manchester United mu gihe babona byanze bagacungira ku mipira ica mu mpande.
Muri uyu mukino, Arsenal yateye amashoti 14 arimo arindwi agana mu izamu mu gihe Manchester United yari umushyitsi yateye amashoti 14 arimo atanu agana mu izamu.
Arsenal yagumanye umupira ku kigero cya 56% kuri 44% ya Manchester United. Iyi kipe yahanye imipira 504 kuri 399 ya Arsenal yari yakiriye umukino.
Uyu mukino wabonetsemo amakosa 21 arimo 12 ya Manchester United ku icyenda ya Arsenal yari mu rugo.
Gushaka ahava igitego byatumye Manchester United itera koruneri zirindwi (7) kuri imwe ya Arsenal.
Amanota atatu yakuye kuri mucyeba byatumye Arsenal igeza amanota 60 mu mikino 33 imaze gukina biyishyira ku mwanya wa kane.
Manchester Unite kuri ubu imaze gukina imikino 34 ikaba imaze kubonamo amanota 54 ayishyira ku mwanya wa gatandatu.
Comments are closed.