Burundi: Raporo ya HRW inyuranya n’amakuru yatanzwe na Leta ku baguye mu nkongi kuri Gereza ya Gitega

Raporo yasohowe n’umuryango uharanira uburenganzira bwa muntu, Human Rights Watch (HRW), ivuga ko abafungiye muri gereza ya Gitega mu Burundi, bemeza ko hapfuye bagenzi babo hagati ya 200 na 400.

Perezida w’Uburundi Evariste Ndayishimiye mu mpera z’ukwezi gushize yavuze ko abapfuye bose hamwe ari 46 kandi “bose bashyinguwe”.

Inkongi y’umuriro yatwitse ibice bya gereza ya gitega tariki 07 Ukuboza 2021. Icyo gihe Minisitiri w’Ubutegetsi bw’Igihugu yatangaje ko iyo nkongi yavuye kuri ‘court-circuit’ y’amashanyarazi.

BBC dukesha iyi nkuru ivuga ko Raporo ya HRW ivuga ko kugeza ubu abategetsi bananiwe gukora iperereza ryizewe kandi ritabogamye, mu kureba uko uwo muriro watangiye, “uko bananiwe gufungurira imfungwa, no kubara neza no gutangaza imyirondoro y’abapfuye n’abakomeretse”.

Umuvugizi wa leta y’u Burundi yabwiye BBC ko ntacyo yavuga kuri iyo raporo ya HRW yasohotse uyu munsi kuwa mbere.

HRW ivuga ko yavuganye na bamwe mu mfungwa z’i Gitega, abo mu miryango yabo, n’abanyamategeko, umwe avuga ko imibare yatanzwe na leta ari ibinyoma, undi ko imiryango y’ababuze ababo ikomeje kubeshywa.