Col Serge Mavinga wari uyoboye ingabo za FARDC mu gace M23 iherutse kwigarurira yatawe muri yombi.

Colonel Serge Mavinga wari Komanda wa FARDC mu gace ka Ntamugenga gaheruka kwigarurirwa n’abarwanyi ba M23 yatawe muri yombi ashinjwa ubugambanyi.

Amakuru dukesha Rwandatribune aravuga ko Col Mavinga afungiwe mu biro by’Ubutasi bwa Gisirikare i Goma, aho yagejejwe ku mugoroba wo kuwa 24 Ukwakira 2022.

Umwe mu ba ofisiye ba FARDC utifuje ko amazina ye atangazwa yavuze ko impamvu yatumye Col Mavinga ajyanwa gukorwaho iperereza, zifitanye isano n’ifatwa ry’agace ka Ntamugenga.

Akomeza avuga ko Col Mavinga ariwe wafashe umwanzuro wo gutegeka abasirikare be gusubira inyuma bakabererekera M23, nyuma yo gusanga muri ako gace hari abaturage b’abasivili bari bugwe mu mirwano iyo barasana nayo, biravugwa ko Col. Mavinga afunganwe n’abandi basirikare 2 bakorana.

Kugeza ubu, Igisirikare cya Repubulika iharanira Demokarasi ya Congo ntacyo kiratangaza ku fungwa ry’uyu musirikare.

Kuva kuwa 20 Ukwakira 2022, Imirwano hagati ya M23 na FARDC yongeye kubura, ikaba imaze gutuma umubare w’abarenga 23,000 bahunga ibyabo.