Leta ya Congo yahakanye amakuru yavugaga ko hari indege y’abafaransa yaje gufasha M23
Umuvugizi wa leta ya DR Congo yatangaje ko indege ya gisirikare y’Ubufaransa yaguye i Kisangani kuwa gatanu ushize yahaguye iri mu kibazo kandi yasatswe n’inzego zibishinzwe.
Mu kiganiro yahaye abanyamakuru cyaciye kuri televiziyo RTNC ya leta, Patrick Muyaya yavuze ko iyo ndege yari mu rugendo ivuye ku kirwa cya Réunion, igomba guca i Bujumbura, igakomereza i Ndjamena (Tchad).
Muri weekend no muri iki cyumweru amakuru y’iyo ndege yavuzweho cyane ku mbuga nkoranyambaga.
Benshi mu banyecongo bemezaga ko ari indege ya gisirikare yazaniye intwaro inyeshyamba za M23 ndetse bagashinja Ubufaransa kuba inyuma y’uwo mutwe.
Muyaya yabwiye abanyamakuru ko iyo ndege yaguye i Kisangani ifite ikibazo “kuko imwe muri moteri zayo yashoboraga gushya.”
Yongeraho ati: “Ikibuga cy’indege cyari hafi y’aho basabye kugwa, ni ikibuga cy’indege cya Bangboka i Kisangani”.
Iyi ndege yari irimo abantu bose hamwe icyenda, amafoto yayo yahererekanyijwe ku mbuga nkoranyambaga, Muyaya avuga ko inzego zibishinzwe zayisatse mu kuyigenzura.
Ati: “Nta kintu cyo gutera ubwoba…Indege iri mu kibazo, itegereje ibikoresho biva i Paris bigasimbura ibyagize ikibazo…Ibyo twasomye ku mbuga nkoranyambaga si ukuri.”
Imirwano hagati ya M23 n’ingabo za leta ivugwaho amakuru menshi y’impande zitandukanye, cyane cyane ku mbuga nkoranyambaga.
M23 ishinja ingabo za leta kurwana zifashijwe n’imitwe y’inyeshyamba irimo uwa FDLR urwanya leta y’u Rwanda, ibyo ingabo za leta na FDLR bagiye bahakana.
Leta ya Kinshasa nayo ishinja iya Kigali gufasha umutwe wa M23, ibyo Kigali nayo yakomeje guhakana.
None kuwa gatatu, biteganyijwe ko ba Perezida Felix Tshisekedi wa RD Congo na Paul Kagame w’u Rwanda bahurira i Luanda muri Angola mu biganiro bishya byo gushaka umuti kuri aya makimbirane.
(Src:BBC)
