Abantu batari munsi ya 19 bishwe naho abandi 21 barakomeraka nyuma yuko abajandarume bo mu mujyi wa Ikongo mu majyepfo ashyira uburasirazuba bwa Madagascar barashe ku itsinda ry’abantu bari barakajwe n’ishimutwa ry’umwana w’umunyamweru.
Ubuyobozi bw’abajandarume (urwego rukora nka polisi) bwavuze ko abakomerekeye muri ibyo byabaye ku wa mbere barimo kuvurirwa ku bitaro byaho.
Abantu bagera kuri 500 bitwaje imihoro bivugwa ko bagerageje kwinjira ku ngufu muri stasiyo y’abajandarume ifungiwemo bane bacyekwaho ubwo bushimusi, nkuko bitangazwa n’ibiro ntaramakuru AFP.
Umukuru w’abajandarume, Andry Rakotondrazaka, yashyigikiye ibikorwa by’abo bajandarume, avuga ko bitabaye nyuma yuko bagira bagerageje kwirinda ubushyamirane.
Ibyabaye kuri uwo mwana washimuswe ntibiramenyekana, ariko abategetsi bavuze ko nyina yishwe n'”abajura”.
Ba nyamweru bagiye bibasirwa mu bihugu bimwe byo muri Afurika kubera imyemerere itari ukuri yuko ibice by’imibiri yabo bishobora gutera amahirwe bikazana n’ubukire.
