Michelle Bachelet yikuye ku rutonde rw’abahatanira kuyobora LONI

Michelle Bachelet wahoze ari Perezida wa Chile ndetse akaba yaranabaye Komiseri Mukuru wa Loni ushinzwe Uburenganzira bwa Muntu, yatangaje ko yikuye mu rugamba rwo guhatanira kuyobora Umuryango w’Abibumbye (Loni), ashyira iherezo ku cyizere cyari gihanzwe amaso na bamwe ko ashobora kuba umugore wa mbere uyoboye uwo muryango kuva washingwa.

Icyemezo cye yagitangaje ku wa 19 Nzeri 2026 binyuze mu butumwa bwa videwo yashyize ku mbuga nkoranyambaga, aho yavuze ko nubwo atazakomeza muri iryo rushanwa, azakomeza ibikorwa bye mpuzamahanga nk’uko yari asanzwe abikora. Mu butumwa bwe, yashimangiye ko yiyamamaje ashingiye ku kurengera ubufatanye mpuzamahanga, amategeko mpuzamahanga, demokarasi n’uburenganzira bwa muntu, avuga ko ibyo ari indangagaciro zikomeje guhura n’ibibazo hirya no hino ku Isi.

Bachelet w’imyaka 74 y’amavuko yari umwe mu bakandida bari bafite ubunararibonye bukomeye mu rwego mpuzamahanga. Yabaye Perezida wa Chile inshuro ebyiri hagati ya 2006 na 2010 ndetse no hagati ya 2014 na 2018. Yanabaye Umuyobozi wa ONU Femmes (UN Women) mbere yo kuba Komiseri Mukuru wa Loni ushinzwe Uburenganzira bwa Muntu hagati ya 2018 na 2022.

Kuva yatangira kwiyamamaza, Bachelet yari ashyigikiwe na Mexique na Brésil, ndetse mu ntangiriro yari yaranashyigikiwe na Chile. Icyakora muri Werurwe 2026, Guverinoma nshya ya Chile iyobowe na Perezida José Antonio Kast yakuyeho ubufasha yari yarahawe n’ubutegetsi bwari bumubanjirije, ibintu byafashwe nk’ibyagabanyije amahirwe ye muri iryo rushanwa.

Icyemezo cyo kwikura muri aya matora cyakurikiye icyiciro cya gatatu cy’itora ry’ibanga ryabereye mu Kanama k’Umutekano ka Loni, aho amakuru yatangajwe n’abakurikiranira hafi icyo gikorwa yagaragaje ko yari amaze gutakaza inkunga nyinshi mu banyamuryango b’ako kanama. Muri iryo tora, Bachelet yabonye inkunga nke cyane ugereranyije n’abandi bakandida, bituma amahirwe ye yo gukomeza agenda agabanuka.

More Read

Gen. Muhoozi Kainerugaba yongeye izina rya Museveni mu mazina ye

Ingabo Zirwanira mu Kirere z’u Rwanda n’iza Maroc Ziyemeje Gukomeza Guhanahana Ubumenyi n’Ubunararibonye

Ubushinwa bwanenze igitekerezo cyuko buri mu ‘irushanwa rigamije ikibi’ ry’ubwenge buhangano

Musanze: Minisitiri w’ingabo Yibukije Abajyanama Inshingano Zo Kubumbatira Umutekano no Gushyigikira Iterambere

Nyuma yo kwikura muri aya matora, hasigaye abandi bakandida bakomeje guhatanira gusimbura António Guterres, Umunyamabanga Mukuru wa Loni uri kurangiza manda ye ya kabiri izarangira ku wa 31 Ukuboza 2026. Mu bari guhabwa amahirwe harimo Rebeca Grynspan wahoze ari Visi Perezida wa Costa Rica ndetse akaba anayobora Ishami rya Loni ryita ku Bucuruzi n’Iterambere (UNCTAD), kimwe na Carolyn Rodrigues-Birkett wa Guyana.

Nubwo atabashije kugera ku ntego ye, Bachelet yavuze ko aticuza kuba yarafashe icyemezo cyo guhatanira uwo mwanya, ashimangira ko byatanze amahirwe yo kongera kuvugurura ibiganiro ku kamaro ko kubona umugore ndetse n’umuntu wo muri Amerika y’Epfo ayobora Loni. Mu mateka y’uyu muryango umaze imyaka irenga 80, nta mugore n’umwe urawuyobora kuva washingwa mu 1945.