Ku mugoroba wo ku wa Kabiri, tariki ya 27 Ukwakira 2026, Urwego rw’Igihugu rw’Iterambere (RDB), ku bufatanye na MOJA Group Inc., batangije ku mugaragaro InteGo!, Tombola y’Igihugu y’u Rwanda, igamije gukusanya umutungo uzifashishwa mu bikorwa by’iterambere rusange birimo siporo, ubuzima n’umuco.
Uyu muhango wo gutangiza iyi tombola wabereye muri Mövenpick Hotel Kigali, RDB yari ihagarariwe na Richard Kayibanda, Umuyobozi ushinzwe gutanga impushya, ari kumwe na Georges Boukazi, Umuyobozi Mukuru wa MOJA Group Inc.
InteGo! iteganyijwe kwinjiriza Leta y’u Rwanda asaga miliyari 55 Frw, ahwanye na miliyoni 37,6 z’amadolari ya Amerika, mu gihe cy’imyaka itanu iri imbere. Aya mafaranga azafasha mu gushyigikira gahunda za Leta zigamije guteza imbere siporo, ubuzima n’umuco, bityo akagira uruhare mu kuzamura imibereho myiza y’abaturage no guteza imbere ubukungu.
Nk’uko RDB yabitangaje, iyi tombola ni imwe mu nzira zigamije gushaka umutungo imbere mu gihugu, hifashishijwe ikoranabuhanga, mu buryo bugamije kurangwa n’umucyo no kubahiriza amabwiriza agenga imikino y’amahirwe.
MOJA Group Inc. ni iki, kandi izagira uruhe ruhare muri InteGo!?
More Read
MOJA Group Inc. ni ikigo gikora ibijyanye n’ikoranabuhanga n’ibisubizo by’ikoranabuhanga, by’umwihariko mu by’imari, serivisi z’amafaranga akoreshejwe kuri telefoni, itumanaho n’imikino y’amahirwe.
Iki kigo gifite ubunararibonye mu gushyiraho no gucunga urubuga rw’ikoranabuhanga rufasha abantu kubona serivisi zitandukanye hakoreshejwe telefoni n’izindi nzira z’ikoranabuhanga.
Mu Rwanda, ibikorwa byo gucunga InteGo! bizakorwa na Moja Rwanda Ltd, ishami rya MOJA Group Inc. ryatoranyijwe binyuze mu ipiganwa. Ku wa 12 Gicurasi 2026, Moja Rwanda Ltd yasinyanye na RDB amasezerano y’imyaka 10 yo gucunga no gukoresha Tombola y’Igihugu.
Aya masezerano agamije gutuma tombola ikorwa hakurikijwe amahame agenga imikorere myiza, umucyo no kubazwa inshingano, mu gihe amafaranga ayikomokaho azafasha mu gushyigikira ibikorwa bigirira Abanyarwanda akamaro.
MOJA Group Inc. izatanga ibisubizo by’ikoranabuhanga n’uburyo bwo gucunga ibikorwa bya tombola, mu gihe igenzura ryayo n’iyubahirizwa ry’amategeko bizakomeza kuba inshingano za National Lottery and Gambling Commission (NLGC), ikorera muri RDB.
Uko Abanyarwanda bazajya bitabira InteGo!
InteGo! yashyizweho mu buryo bw’ikoranabuhanga kugira ngo abantu bashobore kuyitabira bakoresheje telefoni zigendanwa, serivisi z’amafaranga kuri telefoni, urubuga rwa interineti cyangwa porogaramu yabugenewe.
Kwiyandikisha no gutangira gukina bitangirira ku mafaranga 100 Frw. Ushaka kuyitabira akoresheje telefoni ashobora gukanda *759#, cyangwa agasura urubuga rwa www.intego.rw.
Mu mikino iteganyijwe harimo Lotto 5/90, aho umukinnyi ahitamo imibare itanu mu mibare iri hagati ya 1 na 90, ndetse na Fata 12. Ibihembo bitangwa hakurikijwe amategeko n’imiterere ya buri mukino.
RDB yatangaje ko tombola ya Lotto 5/90 izajya itambutswa imbonankubone kuri Televiziyo y’u Rwanda (RBA), guhera ku wa Gatatu, tariki ya 28 Ukwakira 2026.
Gukina mu buryo bushyize mu gaciro
Nubwo InteGo! igamije kwinjiriza igihugu amafaranga azakoreshwa mu bikorwa by’iterambere, abayobozi bashimangiye ko imikino y’amahirwe igomba gufatwa nk’imyidagaduro, aho kuyifata nk’inzira yo kubona ubutunzi cyangwa gukemura ibibazo by’amafaranga.
Abemerewe kuyitabira ni abantu bafite nibura imyaka 18. Hashyizweho kandi uburyo bwo kugena amafaranga umuntu yemerewe gukoresha, gufata ikiruhuko cyo gukina no gusaba gufungirwa konti igihe atagishaka gukomeza kuyitabira.
Abantu bafite impungenge zijyanye n’imikino y’amahirwe bashobora guhamagara umurongo utishyurwa wa 2075 kugira ngo bafashwe.
RDB ivuga ko, binyuze muri National Lottery and Gambling Commission, izakomeza kugenzura imikorere ya InteGo!, kurinda abayitabira no gukurikirana imikoreshereze y’amafaranga ayikomokaho.
Mu byumweru biri imbere, hateganyijwe ibikorwa byo gusobanurira Abanyarwanda uko InteGo! ikora, amategeko agenga imikino yayo n’uburyo bwo kuyitabira mu buryo burengera ubushobozi bwabo.
InteGo! ije mu gihe u Rwanda rukomeje gushaka uburyo bushya bwo gukusanya umutungo wo gushyigikira ibikorwa rusange, hagamijwe ko siporo, ubuzima n’umuco bikomeza kugira uruhare mu iterambere ry’igihugu.
