Édouard Bamporiki wahoze ari Umunyamabanga wa Leta muri Minisiteri y’Urubyiruko n’Umuco, yashimiye Perezida Paul Kagame wongeye kumugirira icyizere akamuha inshingano zo kuba Umunyamabanga Nshingwabikorwa wa Unity Club Intwararumuri, nyuma y’imyaka yari amaze atari mu nshingano za Leta.
Mu butumwa yanyujije ku rubuga nkoranyambaga rwa X kuri uyu wa Kabiri, tariki ya 27 Ukwakira 2026, Bamporiki yagaragaje ko yakiriye izi nshingano nshya azirikana icyizere yari yaragiriwe mbere, avuga ko azakora ibishoboka byose kugira ngo arinde icyo yongeye kugirirwa.
Yagize ati: “Icyi cyizere cyeze, cyije nkizirikana cyimwe cyangiritse cya gihe, mu cyubahiro cyinshi ngomba isoko icyizere nk’iki cyivomwamo. Icyi nacyo ndacyacyiriye, kuzirikana kimwe cyangirikiye umu, bizampa kurinda icyi cyubu. Biganza byera ineza, nzabatera ishema Mwembi.”
Aya magambo agaragaza ko Bamporiki afata izi nshingano nshya nk’amahirwe yo kongera gukorera mu rwego rw’ubuyobozi, anagaragaza ko azirikana ibyabaye mu bihe byashize kugira ngo azabashe kubungabunga icyizere yongeye kugirirwa.
Ishyirwaho rya Bamporiki ryatangajwe mu mpinduka zakozwe mu myanya y’ubuyobozi kuri uyu wa 27 Ukwakira 2026, aho Uwacu Julienne wari Umunyamabanga Nshingwabikorwa wa Unity Club Intwararumuri yagizwe Minisitiri w’Abakozi ba Leta n’Umurimo.
More Read
Nk’uko byatangajwe n’Ibiro bya Minisitiri w’Intebe, Bamporiki yagizwe Umunyamabanga Nshingwabikorwa wa Unity Club Intwararumuri.
Unity Club Intwararumuri ni umuryango ugamije guteza imbere ubumwe, ubwiyunge, amahoro n’imibanire myiza mu Banyarwanda.
Izi nshingano Bamporiki ahawe zije nyuma y’igihe yari amaze atari mu myanya y’ubuyobozi bwa Leta.
More Read
Amateka ya Bamporiki mbere yo kongera guhabwa inshingano
Bamporiki Édouard yamenyekanye mu buzima rusange bw’u Rwanda nk’umunyapolitiki, umwanditsi, umuhanzi ndetse n’umuyobozi mu nzego za Leta. Yabaye Umudepite, nyuma agirwa Umunyamabanga wa Leta muri Minisiteri y’Urubyiruko n’Umuco.
Ku wa 5 Gicurasi 2022, yahagaritswe kuri izo nshingano mu gihe hari gukorwa iperereza ku byaha yashinjwaga birimo ruswa.
Ku wa 30 Nzeri 2022, Urukiko Rwisumbuye rwa Nyarugenge rwamuhamije ibyaha birimo kwihesha ikintu cy’undi hakoreshejwe uburiganya no gukoresha ububasha ahabwa n’itegeko mu nyungu ze bwite, rumukatira igifungo cy’imyaka ine n’ihazabu ya miliyoni 60 z’amafaranga y’u Rwanda.
Nyuma yo kujurira, ku wa 23 Mutarama 2023, Urukiko Rukuru rwongereye igihano cy’igifungo kikagera ku myaka itanu, ariko rugabanya ihazabu ikagera kuri miliyoni 30 z’amafaranga y’u Rwanda.
Mu Kwakira 2024, Perezida Paul Kagame yamuhaye imbabazi, hamwe n’abandi bantu bari barakatiwe n’inkiko, bituma arekurwa nyuma yo kumara igihe mu igororero.
Icyizere gishya mu nshingano zifite aho zihuriye n’ubumwe bw’Abanyarwanda
Kuba Bamporiki yagizwe Umunyamabanga Nshingwabikorwa wa Unity Club Intwararumuri bivuze ko agiye kuyobora ibikorwa by’uyu muryango bigamije kwimakaza ubumwe n’amahoro mu Banyarwanda.
Ubutumwa yanyujije kuri X bugaragaza ko azi ko icyizere yongeye kugirirwa gisaba kukibungabunga.
Mu gihe atangiye izi nshingano nshya, ibizibandwaho mu kazi ke n’umusanzu azatanga mu bikorwa bya Unity Club Intwararumuri ni bimwe mu bizagaragaza uko azasohoza inshingano yahawe.
