Paris Saint-Germain yatsinze Toulouse FC ibitego 2-0 mu mukino uhuza ikipe yatwaye Shampiyona y’u Bufaransa [Ligue 1] ndetse n’iyatwaye Igikombe cy’Igihugu [Coupe de France] wa ‘Trophée des Champions’, yegukana iki gikombe ku nshuro ya 10 mu myaka 11 ishize.
Uyu mukino wabaye ku mugoroba wo ku wa Gatatu, tariki ya 3 Mutarama 2024, kuri Parc des Princes, Kylian Mbappé na Lee Kang-in bafasha ikipe y’i Paris kwegukana intsinzi.
Muri Kanama 2023 ni bwo uyu mukino wagombaga gukinirwa muri Thaïlande kuko n’ubundi usanzwe ubera hanze y’u Bufaransa, ariko urasubikwa wimurirwa muri uyu mwaka kuri stade iberaho imikino ya PSG.
Kylian Mbappé yegukanye igikombe cya mbere nka kapiteni wa PSG
Ku munota wa gatatu gusa, Umunya-Koreya y’Epfo Lee Kang-in uri kwitegura kujya gufasha igihugu cye mu mikino ihuza amakipe yitwaye neza muri Asia, yabonye igitego cya mbere anaba umukinnyi mwiza w’umukino.
Intsinzi yashimangiwe na Rutahizamu Kylian Mbappé washyizemo icya kabiri ku munota wa 44 mbere yo gusoza igice cya mbere ari na byo bitego byonyine byabonetse mu mukino.
Kuva iri rushanwa ryatangira gukinwa mu 1955, Paris Saint-Germain imaze kuritwara inshuro 12 ndetse ni yo kipe imaze kubikora yonyine kugeza ubu. Kuva mu 2013, iyi kipe ntirabura kuri uyu mukino usibye ko mu 2021 ari bwo Lille OSC yayambuye iki gikombe.
Trophée des Champions ni cyo gikombe cya mbere umutoza w’Umunya Espagne Luis Enrique yegukanye kuva ahawe inshingano zo gutoza iyi kipe yo mu Bufaransa.
Nyuma y’umukino, yishimiye intsinzi agira ati “Twari hejuru cyane mu gice cya mbere. Yari iminota 45 myiza twagize kuva nagera muri iyi kipe.”
PSG izasubira mu kibuga ku Cyumweru ikina na Union Sportive Revéloise mu gikombe cy’igihugu ‘Coupe de France’.
