Uwahoze ari Rutahizamu wa Manchester City na Real Madrid, Robinho, yakatiwe gufungwa imyaka icyenda muri Brésil, azira icyaha cyo gufata ku ngufu.
Robinho w’imyaka 40, yahamijwe n’urukiko rwo mu Butaliyani mu 2017 kuba mu gatsiko kafashe ku ngufu umugore w’Umunya-Albania w’imyaka 22 mu 2013.
Kuri ubu, yabaga muri Brésil, igihugu kitajya gitanga abaturage bacyo ngo bajye gufungirwa aho bahamirijwe ibyaha.
Ku wa Gatatu, abacamanzi bo muri Brasília bategetse ko agomba gukorera igifungo cye muri Brésil nyuma yo kubisabwa n’u Butaliyani.
Gusa, abamwunganira mu mategeko bavuze ko Robinho atazajya muri gereza mu gihe bishoboka ko bashobora kujuririra umwanzuro wafashwe.
Robinho wakiniye Brésil imikino 100, yakiniraga Milan AC ubwo icyaha yahamijwe cyabaga.
Nyuma yo guhamywa iki cyaha, yatsinzwe ubujurire mu 2020 mbere y’uko Urukiko Rukuru rw’u Butaliyani rugumishaho igifungo cye mu 2022.
Icyo gihe, abashinjacyaha b’u Butaliyani basabye ko uyu mugabo wahoze ari umukinnyi ukomeye atabwa muri yombi.
Ku Cyumweru, Robinho yabwiye itangazamakuru ryo muri Brésil ko imibonano mpuzabitsina ashinjwa yabaye ku bwumvikane.
Mu rugendo rwe rwo gukina, yatwaye ibikombe bibiri bya La Liga mu myaka ine yamaze muri Real Madrid, mbere yo kugurwa na Manchester City miliyoni 32,5£ [yari menshi icyo gihugu mu Bwongereza) ku munsi wa nyuma w’igura ry’abakinnyi muri Nzeri 2008, ubwo iyi kipe yari imaze kugurwa na Sheikh Mansour.
Nyuma y’imyaka ibiri, Robinho yagiye muri Milan AC, ahamara imyaka itanu mbere yo kwerekeza muri Guangzhou Evergrande yo mu Bushinwa na Clube Atlético Mineiro y’iwabo.
