Mohamed Salah umaze igihe kitari gito akinira ikipe ya Liverpool yaciye amarenga yo kuva muri iyo kipe.
Rutahizamu wa Liverpool Mohamed Salah avuga ko ababajwe no kuba iyo kipe itaramuha kontaro nshya ndetse avuga ko bishoboka cyane ko yayivamo kurusha kuyigumamo.
Kontaro y’uyu mukinnyi w’imyaka 32, kugeza ubu muri uyu mwaka w’imikino umaze kuyitsindira ibitego byinshi kurusha abandi mu marushanwa yose hamwe, izarangira mu mpera y’uyu mwaka w’imikino.
Salah yatsinze ibitego bibiri muri 3-2 Liverpool yatsinze Southampton ku cyumweru, birimo igitego cyo kuri penaliti cy’intsinzi. Byatumye Liverpool, iri ku mwanya wa mbere muri shampiyona ya Premier League, ishyiramo ikinyuranyo cy’amanota umunani hagati yayo n’iyikurikiye.
Uyu rutahizamu w’Umunya-Misiri, wageze muri Liverpool mu mwaka wa 2017 avuye muri Roma, yabwiye abanyamakuru nyuma y’uwo mukino kwa Southampton ati: “Turi hafi kugera mu Kuboza (12) kandi sindabona ubusabe bwo kuguma mu ikipe.
Abajijwe niba ababajwe no kuba nta busabe bwo kuguma muri iyo kipe yari yabona, Salah yagize ati: “Yego, birumvikana.
“Ntabwo nzasezera [ku mupira] vuba aha rero ndimo gukina, nibanda kuri uyu mwaka w’imikino ndetse ndimo kugerageza gutsindira Premier League ndetse nizeye no gutsindira Champions League. Ndababaye ariko tuzareba.”
Liverpool nta cyo yari yatangaza ku mugaragaro kuri aya magambo ya Salah.
Umwe mu bo muri iyo kipe yabwiye BBC Sport ko hakomeje kubaho gushyikirana hagati ya Liverpool na Ramy Abbas Issa, ushinzwe gushakira isoko Salah, ndetse ko birimo kugenda neza.
Rutahizamu Erling Haaland wa Manchester City ni we wenyine umaze gutsinda ibitego byinshi kurusha Salah muri uyu mwaka w’imikino, Salah akaba amaze gutsinda ibitego 10 muri Premier League.
Mu mwaka wa 2022, Salah yashyize umukono kuri kontaro nshya y’imyaka itatu muri Liverpool, iyo kontaro ikaba yitezwe kurangira ku mpeshyi y’umwaka utaha.
Salah yagize ati: “Murabizi ko maze imyaka myinshi muri iyi kipe. Nta yindi kipe nk’iyi ibaho [yayindutira].
“Nkunda abafana. Abafana barankunda. Amaherezo ntibiri mu biganza byanjye cyangwa mu biganza by’abafana. Reka turindire turebe.”
Myugariro Trent Alexander-Arnold na kapiteni w’iyo kipe Virgil van Dijk na bo bazarangiza kontaro zabo mu gihe kimwe na Salah.
Muri Nzeri (9) mu mwaka wa 2023, Liverpool yanze miliyoni 150 z’amapawundi za Al-Ittihad yo muri Arabie Saoudite, yifuzaga kugura Salah.
Nyuma yuko Liverpool inyagiye Manchester United ibitego 3-0 muri Nzeri uyu mwaka, Salah yavuze ko yafashe uwo mukino nk’”uwa nyuma” azakinira ku kibuga Old Trafford cya United.
Nyuma yo gutsinda igitego cy’intsinzi muri 2-1 Liverpool yatsinze Brighton muri uku kwezi, bigatuma Liverpool ijya ku mwanya wa mbere muri shampiyona, Salah yanditse ku rubuga nkoranyambaga X ati: “Icyaba icyo ari cyo cyose, sinzigera na rimwe nibagirwa uko gutsindira kuri Anfield wumva bimeze.”
Comments are closed.