Amakuru akomeje kuvugwa hirya no hino, aremeza ko Lt. Colonel Willy Ngoma yaba yaraye arasiwe mu mirwano mu gace ka Rubaya.
Lt.Colonel Willy Ngoma wari umuvugizi w’umutwe wa AFC M23 biravugwa ko yaraye arasiwe mu bitero bikomeye byabereye mu gace ka Rubaya, agace gaherereye muri teritwari ya Masisi, bikavugwa ko uyu mugabo wari warigaruriye imitima y’abatari bake kubera uburyo yavuganaga n’itangazamakuru, akaba yaranazengereje Leta ya Congo na FARDC yaba yarashwe na drones z’ingabo za Leta FARDC n’abafatanyabikorwa bayo harimo abacancuro ba Black water.
Umwe mu bakurikiranira hafi imirwano ibera muri Congo yagize ati:”Kuva abacancuro ba Black water batangira kwinjira byeruye mu ntambara, igice cya Leta cyagaragaje imbaraga zidasanzwe hakoreshejwe za Drones z’intambara.”
Hari andi makuru avuga ko Leta ya Angola nayo ubwayo yaba yaragambaniye uno mutwe wa AFC M23 ubwo yabasabaga kubahiriza agahenge igahagarika intambara, mu gihe ahubwo icyo gihugu cyaba cyarahise cyohereza ingabo zirenga ibihumbi bibiri gufata mu mugongo ingabo za Leta ya Congo.
Kugeza ubu usibye abantu bakomeje kubyemeza ku mbugankoranyambaga, na bamwe mu basirikare bari ku ruhande rwa Leta ya Congo, ubuvugizi bwa AFC M23 bwaraye buvuze ko Leta ya Congo yabagabyeho ibitero bikomeye ikoresheje za drones ndetse zikarasa zitarobanuye, bikavugwa ko ari muri icyo gitero Willy Ngoma yaba yarasiwemo ahagana saa munani z’ijoro ryo kuwa mbere rishyira kuri uyu wa kabiri.
Umuvugizi wa AFC M23 Bwana Kanyuka Lawrance yagize ati:”FARDC iri kugaba ibitero bikomeye ku basivili itarobanuye mu gace ka Rubaya gaherereye muri teritwari ya Masisi“
Kugeza ubu , hari amakuru yemeza ko uyu mugabo yishwe arashwe, abandi bakavuga ko yaba yarashwe agakomereka cyane nyuma akaza kwicwa n’ibikomere.
Comments are closed.