Mutsinzi Ange yavuze ko we na begenzi be bizeye gutsindira Liberia mu Rwanda

Myugariro w’Ikipe y’Igihugu y’u Rwanda, Amavubi, Mutsinzi Ange Jimmy, yatangaje ko we na bagenzi be biteguye gutangira neza urugendo rwo gushaka itike y’Igikombe cya Afurika cya 2027 (CAN 2027), mu mukino uzabahuza na Liberia kuri uyu wa Gatanu kuri Stade Amahoro.

Uyu mukinnyi usanzwe ukinira amakipe yo hanze y’u Rwanda yagarutse mu gihugu kugira ngo yifatanye n’abandi bakinnyi b’Amavubi mu mwiherero wo kwitegura imikino yo gushaka itike y’iri rushanwa rikomeye ku rwego rwa Afurika.

Mu kiganiro yagiranye n’abanyamakuru mu gitondo cyo kuri uyu wa Mbere, tariki ya 21 Nzeri 2026, akimara kugera i Kigali, Mutsinzi yavuze ko nubwo Liberia ari ikipe ifite ubushobozi, Amavubi afite intego yo gutangira neza aya majonjora no gukusanya amanota atatu y’ingenzi.

Yagize ati: “Ntabwo uzaba ari umukino woroshye kuko Liberia na yo ni ikipe ikomeye. Gusa icyo dushaka ni ugusubira muri AFCON. Tuzatanga ibishoboka byose kugira ngo tubone amanota.”

Aya magambo agaragaza ubushake buri mu bakinnyi b’Amavubi bwo kongera guhesha ibyishimo Abanyarwanda no guhatanira itike yo kwitabira Igikombe cya Afurika, irushanwa igihugu kimaze igihe kirekire kititabira.

More Read

Joy-Lance Mickels yasabye Abanyarwanda kuza gushyigikira AMAVUBI mu mukino uzayahuza na Liberia

U Rwanda rwerekeje muri Côte d’Ivoire mu Gikombe cya Afurika cya Handball U-18

Samuel Eto’o yasabye Afurika gushyigikira Infantino mu matora ya FIFA

Argentine: Imikino yose izahagarara mu guha icyubahiro Lionel Messi

Mutsinzi yavuze ko buri mukinnyi azi neza uburemere bw’uyu mukino ndetse n’akamaro ko gutangirana intsinzi muri aya majonjora.

Yashimangiye ko abakinnyi bose bafite intego imwe yo gukora amateka no guhesha ishema igihugu, bityo ko bazinjirana imbaraga nyinshi mu mukino wa Liberia kugira ngo babone umusaruro mwiza imbere y’abafana babo.

Uyu myugariro kandi yasabye Abanyarwanda kuzitabira ari benshi umukino uzabera kuri Stade Amahoro, avuga ko inkunga y’abafana igira uruhare runini mu gutuma abakinnyi bitwara neza mu kibuga.

Yagize ati: “Turasaba Abanyarwanda kuzaza ari benshi kudushyigikira. Iyo abafana badushyigikiye bitwongerera imbaraga kandi bikadutera ishyaka ryo gukora ibirenzeho. Tuzakora ibishoboka byose kugira ngo tubashimishe.”

Amavubi akomeje kwakira abakinnyi bahamagawe n’umutoza mu rwego rwo gutegura uyu mukino wa Liberia, ufatwa nk’intambwe ya mbere mu rugendo rwo gushaka itike ya CAN 2027. Abakunzi b’umupira w’amaguru mu Rwanda bafite icyizere ko ikipe y’igihugu izatangira neza aya majonjora ikabona intsinzi izayifasha gukomeza urugendo mu mwuka mwiza.

Umukino uzahuza u Rwanda na Liberia utegerejwe n’abatari bake, kuko ushobora gutanga ishusho y’ubushobozi bw’Amavubi muri iri tsinda ndetse n’icyizere cyo kongera kubona u Rwanda mu gikombe gikuru cy’umupira w’amaguru muri Afurika.