Ubuyobozi bw’Umurenge wa Rukoma mu Karere ka Kamonyi bwatangaje ko hari gukorwa iperereza ku rupfu rw’umusore w’imyaka 23, bikekwa ko yishwe na bagenzi be bakoranaga ubucukuzi bw’amabuye y’agaciro mu buryo butemewe n’amategeko.
Iby’uru rupfu rwa Niyongira Alias w’imyaka 23 byabaye ku gicamunsi cyo ku wa Kabiri, tariki ya 22 Nzeri 2026, mu Kagari ka Mwirute, Umurenge wa Rukoma, mu Karere ka Kamonyi.
Amakuru yatangajwe n’ubuyobozi bw’Umurenge wa Rukoma avuga ko abo bantu bari mu bikorwa by’ubucukuzi bw’amabuye y’agaciro mu birombe bitemewe n’amategeko, ari na ho havukiye imirwano hagati yabo.
Muri iyo mirwano, bikekwa ko umwe mu bari muri icyo gikorwa yakoresheje umuhoro agatemagura mugenzi we, bikamuviramo gukomereka bikomeye ndetse nyuma akitaba Imana.
Ubuyobozi bw’Umurenge wa Rukoma bwatangaje ko iperereza ryatangiye kugira ngo hamenyekane neza icyateye iyo mirwano, uko byagenze ndetse n’ababa bafite uruhare muri urwo rupfu.
(Inkuru ya Habimana Ramadhan/ indorerwamo.com)
