Hamenyekanye ibyo Perezida Paul Kagame yaganiriye na Ramaphosa wa Afrika y’Epfo

Perezida Ramaphosa wa Afrika y’Epfo yaraye ahamagaye kuri terefoni Perezida Paul Kagame baganira ku mutekano muke uri kuvugwa muri DRC.

Cyril Ramaphosa wa Afrika yaraye ahamagaye kuri terefone perezida Paul Kagame w’u Rwanda, aba bombi bikavugwa ko baganiriye ku mutekano muke uri mu gihugu cya Congo aho bivugwa ko umutwe wa M23 waba umaze kwigarurira umujyi wa Goma.

Ibiro bya Perezida Ramaphosa byasohoye itangaza rivuga ko aba bayobozi bombi banaganiriye ku basirikare ba SAMIDRC bivugwa ko bari kwibasirwa muri ino mirwano ndetse hakaba hari n’amakuru yemeza ko hari abahitanywe n’iyo mirwano.

Iri tangazo rikomeza rivuga ko bombi bemeranijwe ko amahoro agomba kugaruka muri aka gace ka Goma ndetse ko impande zihanganye zigomba gukemura ikibazo mu nzira z’ibiganiro.

Kuwa 25 Mutarama 2025, Ihuriro ry’abasirikare bo muri Afurika y’Epfo ryatangaje ko abasirikare batatu b’iki gihugu bapfiriye mu mirwano bari bahanganyemo n’umutwe witwaje intwaro wa M23 mu Burasirazuba bwa Repubulika Iharanira Demokarasi ya Congo.

Iri huriro rizwi nka SANDU ryasobanuye ko aba basirikare bishwe tariki ya 23 Mutarama, hakomereka bagenzi babo 14.