Perezida wa Iran, Masoud Pezeshkian, yatangaje ko igihugu cye kitazigera cyunamira cyangwa gipfukamire Leta Zunze Ubumwe za Amerika, ariko ashimangira ko kigifite ubushake bwo kugirana ibiganiro bigamije guhagarika intambara n’umwuka mubi bimaze amezi hafi arindwi hagati ya Iran n’ibihugu biyishinja guteza umutekano muke mu karere.
Pezeshkian yabivugiye mu ijambo yagejeje ku Nteko Rusange y’Umuryango w’Abibumbye (Loni) iri kubera i New York, nyuma y’umunsi umwe Perezida wa Leta Zunze Ubumwe za Amerika, Donald Trump, avuze ko igihugu cye gishobora gufata ingamba zikomeye kuri Iran mu gihe hataboneka amasezerano yemerwa n’impande zombi.
Mu ijambo rye, Perezida wa Iran yavuze ko abaturage b’icyo gihugu badashobora gucibwa intege n’ibihano cyangwa iterabwoba rya Amerika n’abambari bayo, ko ahubwo bakorerwa bibongera imbaraga bigatuma baba umwe.
Yagize ati: “Uko ibihano, iterabwoba n’ibitero byiyongera, ni ko Abanya-Iran barushaho gukomera, kwihangana no kunga ubumwe. Ntituzigera twunamika umutwe cyangwa ngo dupfukamire undi wese.”
Iri jambo ryakurikiwe n’igikorwa cyagaragaye nk’ubutumwa bwa dipolomasi, aho bamwe mu bahagarariye Leta Zunze Ubumwe za Amerika basohotse mu cyumba cyaberagamo inama ubwo Pezeshkian yari agitangira kuvuga. Kugeza ubu, ubuyobozi bwa Amerika ntiburagira icyo butangaza kuri icyo gikorwa cyangwa ku magambo yavuzwe na Perezida wa Iran.
More Read
Nubwo yakoresheje imvugo ikomeye, Pezeshkian yagaragaje ko Iran ikomeje kwemera inzira y’ibiganiro, ariko ashimangira ko ibiganiro byose bigomba kuba bishingiye ku bwubahane kandi bitarimo igitutu cyangwa iterabwoba.
Yavuze ko amasezerano ayo ari yo yose ashobora kugerwaho agomba no gukemura ikibazo cy’ibihano Amerika yashyize ku bwikorezi bwo mu nyanja bwa Iran, cyane cyane ku ikoreshwa ry’Umuhora wa Hormuz, inzira y’ingenzi inyuramo igice kinini cya peteroli icuruzwa ku Isi.
Perezida wa Iran yabajije impamvu ibindi bihugu byemerewe gukoresha uwo muhora mu bwisanzure, mu gihe igihugu cye gikomeje guhura n’imbogamizi n’ibihano bibibuza kuwukoresha nk’uko bikwiye.
More Read
Mu rwego rwo kugaragaza ibyo Iran ivuga ko ari ingaruka z’ibitero yagabweho, Pezeshkian yeretse abari bitabiriye Inteko Rusange ya Loni amafoto y’uwahoze ari Umuyobozi w’Ikirenga wa Iran, Ayatollah Ali Khamenei, igihugu cye kivuga ko yishwe mu gitero cyagabwe na Amerika ifatanyije na Israel mu mpera za Gashyantare uyu mwaka.
Yanerekanye amafoto y’abasivile Iran ivuga ko baguye mu bitero byagabwe ku ishuri ribanza ryo mu mujyi wa Minab no ku kibuga cy’imikino cyo muri Lamerd.
Ku rundi ruhande, Leta Zunze Ubumwe za Amerika yahakanye uruhare mu gitero cyo muri Lamerd, ivuga ko igikomeje gukora iperereza ku byabereye i Minab kugira ngo hamenyekane ukuri kwabyo.
Ku ngingo ijyanye na gahunda ya nikleyeri, Perezida Pezeshkian yongeye gushimangira ko Iran idafite gahunda yo gukora ibirwanisho bya kirimbuzi, ariko ko itazemera kwamburwa uburenganzira bwo gukoresha ingufu za nikleyeri mu bikorwa by’amahoro birimo ubushakashatsi, ubuvuzi n’iterambere ry’inganda.
Aya magambo aje mu gihe hari ibimenyetso byerekana ko impande zombi zishobora kuba ziri gushaka inzira yo kugabanya ubushyamirane. Ku wa Kabiri, Minisitiri w’Ububanyi n’Amahanga wa Iran, Abbas Araghchi, yagiranye ibiganiro n’intumwa ya Amerika, Steve Witkoff, binyuze ku buhuza bwa Qatar.
Iran yatangaje ko muri ibyo biganiro yongeye gusaba ko habaho guhagarika intambara, ubwato bwayo bugahabwa uburenganzira bwo kugenda mu nzira mpuzamahanga z’amazi, ndetse n’imitungo yayo yafatiwe muri Amerika ikarekurwa.
Ijambo rya Perezida Pezeshkian ryibanze ku butumwa bubiri bukomeye: kugaragaza ko Iran itazemera igitutu cyo hanze, no kwerekana ko igifunguye amarembo y’ibiganiro bishobora gutanga umuti urambye ku bibazo bimaze amezi menshi byugarije umubano wayo na Leta Zunze Ubumwe za Amerika.
