Kuri uyu wa Kane, Itsinda ry’Impuguke mu bijyanye n’amahugurwa ya gisirikare ryaturutse mu Ngabo zirwanira mu Kirere z’Ubwami bwa Maroc ryakiriwe ku Cyicaro Gikuru cy’Ingabo z’u Rwanda (RDF), aho ryagiranye ibiganiro n’Umugaba Wungirije w’Ingabo z’u Rwanda zirwanira mu Kirere, Col Dan Gatsinzi.
Ibiganiro byahuje impande zombi byibanze ku kurebera hamwe uburyo bwo kurushaho gushimangira ubufatanye hagati y’Ingabo zirwanira mu Kirere z’u Rwanda n’iza Maroc, by’umwihariko mu bijyanye n’amahugurwa, kungurana ubumenyi n’ubunararibonye ndetse no guteza imbere ubushobozi bwa gisirikare mu rwego rw’indege.
Uru ruzinduko rugaragaza umubano mwiza usanzwe hagati y’ibihugu byombi, byakomeje gufatanya mu nzego zitandukanye zirimo umutekano, amahugurwa ndetse n’iterambere ry’ubushobozi bw’ingabo.
Mu rwego rwo guha icyubahiro abazize Jenoside yakorewe Abatutsi mu 1994, abagize iri tsinda basuye Urwibutso rwa Jenoside rwa Kigali, bunamira inzirakarengane zihashyinguye ndetse banasobanurirwa amateka ya Jenoside n’ingaruka zayo ku Rwanda.
Bananasuye Ingoro y’Amateka y’Urugamba rwo Guhagarika Jenoside, aho bahawe ibisobanuro ku rugendo rwabayeho mu guhagarika Jenoside yakorewe Abatutsi no kubohora igihugu, ndetse n’uruhare rwagize mu kubaka u Rwanda rw’ubu rushingiye ku bumwe, umutekano n’iterambere.
More Read
Abakurikiranira hafi ibya gisirikare bagaragaza ko uru ruzinduko rushobora kurushaho gushimangira umubano usanzwe hagati y’Ingabo zirwanira mu Kirere z’ibihugu byombi, cyane cyane mu guhanahana ubunararibonye no kongera ubushobozi bw’abasirikare binyuze mu mahugurwa n’ubufatanye bwa tekiniki.
Uruzinduko rw’iri tsinda ruje mu gihe u Rwanda rukomeje guteza imbere ubufatanye n’ibihugu bitandukanye hagamijwe kubaka ingabo zifite ubushobozi bujyanye n’igihe, zishobora kugira uruhare mu kubungabunga amahoro n’umutekano haba mu gihugu no mu rwego mpuzamahanga.
More Read
