Iminsi imaze kuba 2 yikurikiranya nta murwayi wa Covid-19 ugaragaye mu Rwanda

Ministeri y’ubuzima mu Rwanda yatangaje ko nta murwayi wa covid-19 wabonetse uyu munsi mu bipimo byafashwe.

Taliki 14 na 15 z’uku kwezi kwa Gicurasi, ibaye iminsi ibiri yikurikiranije ata murwayi wa Coronavirus ugaragajwe n’ibipimo byafashwe kuva ku italiki ya 14 Werurwe ubwo umurwayi wa mbere yagaragaraga ku butaka bw’U Rwanda.

None ku italiki ya 15 Gicurasi, hafashwe ibipimo bigera kuri 1,058 muri ibyo bipimo byose nta muntu Wigeze usanganwa agakoko ka Coronavirus. Ministeri y’ubuzima yatangaje ko kuva umujtu wa mbere yagaragaza ubwandu bwa covid-19 kugeza ubu hamaze gufatwa ibipimo 46,198, muri ibyo bipimo abagera kuri 287 basanze baranduye mu gihe abagera kuri 186 bamaze gukira (Harimo n’icyenda bakize uyu munsi), bivuga ko abakirwaye ari 101, ministeri ikaba ivuga ko abo bose nta wurembye cyane ubarimo, kandi ko bose bari ahantu hamwe aho bakurikiranwa n’abaganga. Ariko nubwo bimeze bityo, Leta irakangurira Abanyarwanda kutirara ahubeo bagakomeza kubahiriza amabwiriza yose yatanzwe na Leta mu rwego rwo guhashya burundu icyo cyorezo.